Жорий йилнинг 9—14 май кунлари Македония пойтахти Скопьеда тўққизинчи бор ўтказилган Халқаро фалсафий фильмлар фестивалида ўзбекистонлик режиссёр Шокир Ҳолиқов ҳам ўзининг «Чой» номли қисқа метражли фильми билан иштирок этди. Бу ҳақда «Дарё» мухбири Миролим Исажонов хабар берди.
Мазкур анъанавий фестивалда дунёнинг Туркия, Польша, Россия Федерацияси сингари 14 давлатидан режиссёрлар ўз ижод маҳсуллари билан қатнашди. Шокир Ҳолиқовнинг «Чой» картинаси «Томошабин меҳрини қозонган фильм» ҳамда «Ҳакамлар ҳайъатининг махсус мукофоти» номинацияларига лойиқ кўрилди.
Шу ўринда қайд этиш жоизки, режиссёр ушбу фильми орқали ўтган бир йил мобайнида Қозоғистон, Тожикистон, Қирғизистон, Ҳиндистон, Бразилия, Россия Федерацияси, АҚШ каби мамлакатларда бўлиб ўтган халқаро қисқа метражли фильмлар фестивалларида ҳам Гран-при ва қатор номинацияларни қўлга киритган. Шунингдек, унинг «Бизни тушунишмайди» ва «Дилемма» кинолари ҳам халқаро фестивалларда муносиб ўринларни қайд этган.
Изоҳ (0)