Тошкент Москва давлат халқаро муносабатлар институти (МГИМО) битирувчиларининг V халқаро форумига мезбонлик қилмоқда. Бу ҳақда ЎзА хабар берди.
Ушбу нуфузли тадбирда 32 мамлакатнинг ҳукумат, парламент аъзолари, сиёсатчилар, дипломатлар, йирик хорижий компаниялар раҳбарлари ва МГИМО вакиллари қатнашмоқда. Шундай иштирокчилар сони 450 нафардан зиёдни ташкил этмоқда. Уларни Россиядаги энг нуфузли олий таълим муассасасида кечган талабалик йиллари бирлаштириб туради.
Пойтахтдаги Симпозиумлар саройида форумнинг очилиш маросими бошланди. Шавкат Мирзиёев ва Владимир Путиннинг форум иштирокчиларига йўллаган табриги ўқиб эшиттирилди.
Форумнинг сиёсат, хавфсизлик, иқтисодиёт ва маданият соҳаларига бағишланган сессияларида Мўғулистон ташқи ишлар вазири Д.Согбаатар, Словакия ташқи ишлар вазири М.Лайчак, Камбоджа таълим вазири Н.Хан Чуон, «Рособрнадзор« раҳбари С.Кравцов ва Евроосиё банки директорлар кенгаши аъзоси Фаттоҳ Шодиев чиқиш қилади.
Шунингдек, форум доирасида меҳмонлар ва Ўзбекистон ишбилармон доира вакиллари ўртасида учрашув бўлиб ўтади. Хорижий экспертлар иштирокидаги мулоқотларда таълим, маданият, инвестиция соҳаларида ҳалқаро ҳамкорлик, Марказий Осиёда хавфсизлик масалалари юзасидан фикр алмашиш кўзда тутилган.
Форум кун тартибига МГИМО янги тараққиёт стратегияси муҳокамаси қўйилган. Шу билан бирга, институтнинг Тошкент филиали дастурларининг тақдимотлари ҳам ўтказилади.
Маълумот учун, Москва давлат халқаро муносабатлар институти битирувчиларининг I халқаро форуми 2003 йилда Боку шаҳрида ўтказилган, кейинчалик Москва, Ереван, Нур-Султон шаҳарлари ҳам ушбу нуфузли тадбирга мезбонлик қилганди.
Форум очилиш маросимида Бош вазир Абдулла Арипов иштирок этмоқда.
Изоҳ (0)