Халқаро пресс-клуб сессиясида Марказий банк раиси Мамаризо Нурмуродов «Ҳар бир оила — тадбиркор» давлат дастури доирасида кредит олганлар фаолияти ўрганилаётгани ҳақида гапирди. Бу ҳақда ЎзА хабар берди.
— Биз кўпроқ муҳтож оилаларга асосий эътиборни қаратяпмиз, — деди М.Нурмуродов. — Лекин кредит ажратишда кам таъминланганлик тўғрисидаги ҳужжат талаб этилмайди. Қайси касбда бўлишидан қатъий назар, қўшимча даромад олмоқчи бўлганларга имкон берилмоқда.
Ҳатто таъминотчиларга ҳам маҳсулот олиб келиш учун кредит ажратилмоқда. Фақат улардан сифатли маҳсулот олиб келиш талаб этилади.
Иссиқхона қуриш учун кредит олган, лекин маблағни бошқа мақсадда ишлатганлар ҳам аниқланди. Бундай ҳолатлар учраб турибди.
Таъкидланишича, пулни сандиқда сақлагандан кўра, банкда сақловчилар кўпайди. Улар валюта шаклида уйда сақламасдан, банкка ишонч билдирмоқда. Ўтган йили аҳолининг муддатли омонатлар ҳажми 72 фоизга ўсган.
Сессияда «Марказий банкнинг қайта молиялаштириш ставкаси 16 фоиз, лекин тижорат банклари фоизи жуда юқори. Тижорат банкларини назоратга олиш мумкин эмасми», деган саволга Марказий банк раҳбариятининг бунга ваколати йўқлиги маълум қилинди.
Изоҳ (0)