Соғлиқни сақлаш вазири Алишер Шодмонов бошчилигидаги делегация фармацевтика саноатини ривожлантиришда икки томонлама ҳамкорликни янада мустаҳкамлаш мақсадида Жанубий Кореяда бўлди. Бу ҳақда «Дарё»га вазирлик матбуот хизмати маълум қилди.
Ташриф доирасида делегация Eulji университети раҳбарияти билан учрашди. Мулоқотда Корея томони Ўзбекистонда университет филиали ва клиникасини ташкил этишга қизиқиш билдирди. Ушбу лойиҳани муҳокама қилиш мақсадида яқин вақт ичида Eulji University раҳбари Хонг Сонг Хи Ўзбекистонга ташриф буюришни режалаштираётганини қайд этди. Музокаралар якунида томонлар ўзаро англашув меморандумини имзолади.
Делегация аъзолари Осан шаҳрида 20 йилдан буён фаолият юритаётган Биофармкластерда ҳам бўлшди. Бу ерда жойлашган фармацевтика ва био-фармацевтика компаниялари, илмий-тадқиқот институтлари, клиникалар, лабораториялар ва венчур жамғармалари фаолияти билан яқиндан танишди.
Мулоқот якунида томонлар Ўзбекистонда фармацевтика кластерини ташкил этиш борасида «Йўл харитаси»ни тайёрлаш бўйича ишчи гуруҳ тузишга келишиб олди. Ушбу келишув Соғлиқни сақлаш вазири Алишер Шодмонов ва Жанубий Корея Биофармкластери раҳбари Пак Гусун ўртасида имзоланган ўзаро англашув меморандуми билан мустаҳкамланди.
Изоҳ (0)