Навоийда фуқарони мактабга ишга кириш учун пора беришга ундаган шахсларга суд ҳукми ўқилди

Жиноят ишлари бўйича Навоий шаҳар судининг очиқ сайёр суд мажлисида, Кармана туман Халқ таълим бўлими мажлислар залида пора беришга далолат қилган икки нафар аёлга нисбатан жиноят иши кўриб чиқилди. Бу ҳақда «Дарё»га жиноят ишлари бўйича Навоий шаҳар суди судьяси Адиз Авезов хабар берди.

Иш ҳолатларига кўра, С. Имомова (исм-фамилиялар ўзгартирилган) 2018 йил 2 апрелдан Кармана тумани, «Арғун» маҳалла фуқаролар йиғинида хотин-қизлар билан ишлаш ва оилаларда маънавий-ахлоқий қадриятларни мустаҳкамлаш бўйича мутахассис вазифасида ишлаб келиб, Кармана тумани, Халқ таълим бўлимига қарашли 7-сонли умумий ўрта таълим мактаб ўқитувчиси Г. Алиева билан жиноий тил бириктириб, бир гуруҳ шахслар бўлиб, ўзганинг мулкини фирибгарлик йўли билан эгаллаш мақсадида А. Бўриевга унинг турмуш ўртоғи Чарос исмли шахсни Навоий шаҳридаги мактаблардан бирига ишга жойлаштириб бериш эвазига 500 доллар миқдоридаги пулни Навоий шаҳар, Халқ таълими бўлимидаги танишларига пора тариқасида бериши кераклигини билдирган. Ишга жойлаштиришда ваколатга эга бўлмаса-да, 2019 йил 22 январь куни Кармана тумани, «Арғун» МФЙ маъмурий биносида А. Бўриевдан 500 долларни олган вақтда ҳуқуқни муҳофаза қилувчи орган ходимлари томонидан ўтказилган тезкор тадбир давомида ашёвий далиллар билан ушланган.

Судланувчи С. Имомова ва Г. Алиевалар дастлабки терговда берган кўрсатувларини тасдиқлаб, суд мажлисида айбларига иқрорлик билдириб, қилмишидан чин кўнгилдан пушаймонда эканлиги ҳақида кўрсатув бериб, суддан ўзларига нисбатан енгиллик беришни сўради.

Судда, судланувчи С. Имомова ва Г. Алиевалар айбларига иқрорлик билдириб кўрсатув берган бўлсаларда, уларнинг айблари судда тўпланган далиллар билан ўз тасдиғини топди.

Суд барча ҳолатларни синчковлик билан ўрганиб, даллилларга баҳо бериб, С. Имомовани ЖКнинг 168-моддаси 2-қисми «б» банди, 28, 211-моддаси 1-қисмида назарда тутилган жиноятларни содир қилганликда айбли деб топиб, унга ЖКнинг 45, 59-моддалари тартибида тайинланган жазоларни қисман қўшиш йўли билан 1 йил мансабдорлик ва моддий жавобгарлик ишларида ишлаш ҳуқуқидан маҳрум қилинди ва 2 йил 6 ой аҳлоқ тузатиш ишлари жазоси тайинланди.

Шунингдек, Г. Алиева эса ЖКнинг 168-моддаси 2-қисми «б» банди, 28, 211-моддаси 1-қисмида назарда тутилган жиноятларни содир қилганликда айбли деб топилиб, ЖКнинг 59-моддаси тартибида тайинланган 2 йил 3 ой аҳлоқ тузатиш ишлари жазоси тайинланди.