Ўзбекистон ёшлар иттифоқи, Кинематографияни ривожлантириш маркази ҳамда Ёш киноижодкорлар кенгаши томонидан жорий йил 14—25 май кунлари 72-Канн халқаро кинофестивали доирасида иккинчи бор «Ўзбекистон миллий павильони» ташкил қилинади. Бу ҳақда «Дарё»га Ёшлар медиа маркази маълум қилди.
Фестиваль олдидан Кинематографияни ривожлантириш марказида матбуот анжумани бўлиб ўтди. Унда мутасаддилар Ўзбекистоннинг халқаро фестивалда иштирокининг аҳамияти ҳамда келгусида эришилиши кутилаётган ютуқлар ҳақида фикр билдирилди.
Шунингдек, павильон қатнашчилари «PROlogue V» халқаро кинофестивалининг тақдимотини ўтказиш ва унга хорижлик киноижодкорларни таклиф этиш, чет эл кинокомпанияларини Ўзбекистонда фильмлар суратга олиш учун жалб қилишни режалаштирганини таъкидлади. Маҳаллий кинематография вакиллари иштирокида қўшма кинолойиҳалар яратиш ҳамда Ўзбекистонда кинотуризм соҳасини ривожлантиришга қаратилган музокаралар олиб борилиши ҳақида атрофлича маълумот берилди.
—Халқаро Канн кинофестивали кино бўйича энг нуфузли фестиваллардан ҳисобланиб, ундаги кинобозорда ҳар бир мамлакат ўз павильонини ташкил этиб, соҳадаги салоҳиятини намойиш этади. Фестиваль Ўзбекистонга кинотуризм салоҳиятини намойиш этиш ва уни фильм олиш учун қулай ва оптимал локация сифатида тарғиб қилиш ҳамда таниқли кинокомпанияларни фильмларини суратга олиш учун таклиф қилиш имкониятини яратади, – дейди Кинематографияни ривожлантириш маркази директори Ойбек Абдушукуров.
Ўзбекистон миллий павильони Ёшлар иттифоқи, Туризмни ривожлантириш қўмитаси, Кинематографияни ривожлантириш маркази, Ўзбекистон миллий кинокомиссияси ҳамда Ўзбекистоннинг Франциядаги элчихонаси ҳамкорлигида ташкил қилинмоқда.
Изоҳ (0)