«Юлдузлар жанги» фильмининг янги эпизодлари 2022, 2024 ҳамда 2026 йилларда экранга чиқади. Бу ҳақда мазкур франшизани суратга олиш ҳуқуқига эга Walt Disney Company’га асосланиб, Reuters хабар берди.
Жорий йилнинг охирида киносаганинг тўққизинчи эпизоди — «Скайуокернинг уйғониши» прокатга чиқади, у режиссёр Жей Жей Абрамс томонидан суратга олинган. Бу трилогиянинг сўнгги қисми бўлади.
Disney ижрочи директори Боб Айгернинг таъкидлашича, компания озгина танаффус қилишга ва уч йилдан сўнг «Юлдузлар жанги»нинг янги қисмларини чиқаришга қарор қилган. Келажакда суратга олинадиган эпизодларнинг номи ҳозирча сир сақланмоқда.
Шунингдек, компания «Аватар-2» фильмининг премьерасини 2020 йилдан 2021 йилнинг декабрига кўчиргани маълум бўлди. Сўнгги қисмини эса 2027 йилда чиқариш режалаштирилган. Картинанинг биринчи қисми 2009 йилда экран юзини кўрган ва тарихдаги энг кассабоп фильмлардан бирига айланган эди.
Disney 2019 йилнинг мартида 21st Century Fox’нинг кўнгилочар активларини сотиб олганди. Келишув суммаси 70 миллиард доллардан ошган. Компания «Аватар» ҳуқуқи билан бирга «Симсонлар» мультсериалини тасвирга олиш ҳуқуқини ҳам қўлга киритган эди.
Изоҳ (0)