Президент Сурхондарё вилоятига ташрифи чоғида «Киномобиль» — Ўзбекистондаги биринчи инновацион кинотеатр лойиҳаси тақдимоти билан танишиб, тегишли тавсияларни берган эди. Шунга мувофиқ Миллий банк билан ҳамкорликда амалга оширилган мазкур лойиҳа Термиз шаҳрида кино мухлисларига хизмат кўрсатишни бошлади, дея хабар беради ЎзА.
MAN автомобилига ўрнатилган мобиль кинотеатр барча мавсумга мослаштирилган бўлиб, иситиш, вентиляция, совутиш тизими билан жиҳозланган.
Инновацион мобиль кинотеатрни ишга тушириш учун 30 дақиқа вақт сарфланади. Бу вақтда қурилма энига 6 метргача кенгаяди ва 80 кишига хизмат кўрсатиш қувватига эга бўлади.
Томошабинлар ўзбек ва жаҳон кинематографияси янгиликлари билан рақамли 2D ҳамда 3D форматида танишиш имкониятига эга бўлади.
Айни пайтда инновацион кинотеатрнинг илк мижози бўлган Термиз давлат университети талабалари учун «Skorpion», «Элпарвар», «Саид ва Саида» бадиий ҳамда «Абу Исо Муҳаммад ат-Термизий» ҳужжатли фильмлари намойиш этилмоқда.
Изоҳ (0)