Ижтимоий тармоқлардаги машҳур блоггерлардан бири, Индонезиядаги ўн бир нафар фарзандли Ген ва Ҳалилинтар оиласи айни пайтда Ўзбекистоннинг туристик салоҳиятини оширишга қаратилган навбатдаги ижодий сафар билан мамлакатда бўлиб турибди. Бу ҳақда Туризмни ривожлантириш давлат қўмитаси матбуот хизмати хабар берди.
Туризмни ривожлантириш давлат қўмитаси раиси вазифасини бажарувчиси Абдулазиз Оққулов Фарғонада тасвир ишларини олиб бораётган ижодий гуруҳ билан учрашиб, Ўзбекистон туризмини фаол тарғиб этаётган блоггерлар билан суҳбатлашди.
«Биз айнан икки мамлакат пойтахтини боғлаб турувчи ‘Ўзбекистон ҳаво йўллари’ МАК ҳаво лайнерида Туризмни ривожлантириш давлат қўмитаси таклифи билан тўғридан-тўғри қатновни амалга оширдик. Бу эса жорий йилги фаолиятимизни янада жонлантиради. Биз нафақат қадимий Самарқанд, Бухоро шаҳарларини, балки сўлим ва бетакрор, йирик туризм салоҳиятига эга бўлган Фарғона водийси ҳақида ҳам махсус видео материаллар тайёрлаш ниятидамиз. Бу ердаги 3 кунлик ташрифимиз давомида қўмита билан ҳамкорликдаги Рамазон ойига бағишланган махсус тарғибот ролигини тасвирга олмоқдамиз ҳамда ижодий сафаримиз самарали ўтишига ишончимиз комил», — дейди меҳмонлар.
Ген ва Ҳалилинтар Ўзбекистон ҳамда Индонезия ўртасида туристик имкониятлар учун кенг йўл очиб берилаётгани, Жакартадан Тошкентга қадар очилган авиақатновлар халқлар ўртасидаги алоқаларнинг мустаҳкамланишига хизмат қилишини билдирди.
Ген ва Ҳалилинтар оиласи King of YouTube («YouTube қироли») деган номга сазовор бўлиб, оила ўзининг YouTube’даги каналида жуда катта – 40 миллионлик аудиторияга эга. YouTube платформасида уларнинг томошабинлари сони 2 милларддан ортиқни ташкил этади. Эътиборлиси, улар неча йилдирки, Ўзбекистон ҳақида махсус материаллар тайёрлаб, уларни томоша қилаётганлар сони 150 мингдан ошган.
Ижодий гуруҳ томонидан жорий йилнинг январь ойида Чимён тоғларида, Тошкент, Самарқанд ва Бухоро шаҳарларида тасвирга олинган «Зигги-Загга» номли қўшиғига ишланган клип 50 миллион марта томоша қилинган.
«2014 йилда Ген ва Ҳалилинтар оиласи Самарқандда саёҳатда бўлиб, Ўзбекистондаги тарихий-маданий иншоотлар, муқаддас қадамжолар ва халқ маданияти, анъана ва урф-одатлари ҳақида «Ўзбекистон – меҳмондўст давлат» («Uzbekistan negara sahabat») номли китоб ёзди. Бу китоб 100 минг нусхада нашр этилиб, Индонезияда жуда машҳур бўлган. Мазкур китоб ўзбек тилига таржима қилиниб, Самарқандда нашр этилиши режалаштирилган», — дейилади хабарда.
Яқин кунларда Ген ва Ҳалилинтар оиласи Ўзбекистоннинг Индонезиядаги лого сфера тарғиботчиси махсус сертификати билан тақдирланиши режалаштирилган.
Изоҳ (0)