Ўзбекистон Президенти Шавкат Мирзиёев Фарғона вилоятига ташрифи давомида Фарғона шаҳридаги «Темурбеклар мактаби»да бўлди. «Ўзбекистон 24» телеканали мактабга ташрифдан лавҳаларни эфирда намойиш этди.
Президент мактаб ўқувчилари билан суҳбат давомида улардан бир дақиқа ҳам вақтни бекор ўтказмасликни илтимос қилди. Айни вақтда, мактаб битирувчиларининг бари давлат гранти асосида ўзи хоҳлаган йўналишда олий таълим муассасасида таҳсил олиши мумкинлигини маълум қилди.
Нима учун «Темурбеклар мактаби» деб номладик? Юриш-туришингиз, билимингиз шундай бўлиши керакки, ўзбек миллатида буюк ота-боболарининг қони борлигини сизларга қараб билишсин; 10 та бола турганида, еттинчиси ўзбек эканлигини сездиришингиз керак. Нима билан сездирасиз? Соғломлигингиз, билимингиз, хорижий тилларни билишингиз билан.«Темурбеклар мактаби»ни тугатишингиз билан давлат гранти асосида олий таълим муассасасига ўқишга кирасиз. Хоҳлаганингиз мудофаага, хоҳлаганингиз тиббиётга, хоҳлаганингиз педагогикага. Бирортангиз ҳам четда қолмайсиз. Келажакда бошқа йўналишдаги олийгоҳда ўқисангиз ҳам, «Бу йигит «Темурбеклар мактаби»дан чиққан», деб айтишлари керак. Ота-оналар: «Фарзандимни «Темурбеклар мактаби»да ўқитишим керак», деган орзу-ҳавас билан яшаши керак.
Битта илтимосим бор — бир дақиқа ҳам вақтингизни бекор ўтказманг. Ё ҳозир, ё ҳеч қачон! Бугун билим олмасангиз, эртага кеч бўлади. Эҳ, аттанг, деб қоласиз. Негаки, сизлар ҳамма соҳада бошқаларга нисбатан — яна такрор ва такрор айтаман — бошқача бўлишингиз керак. Ўрнак бўлишингиз керак. Бекорга буюк саркарда бобомизнинг номини берганимиз йўқ. Бунга муносиб бўлишингиз керак.
Шавкат Мирзиёев, Ўзбекистон Президенти
Изоҳ (0)