Қамчиқ довонидаги йўл-патруль хизмати масканида «Шараф ленталари» тарқатилди (фото)
Қамчиқ довонининг Наманган вилоятининг Поп туманидан ўтувчи қисмида жойлашган йўл-патруль хизмати масканида Хотира ва қадрлаш кунига бағишланган тадбир бўлиб ўтди. Бу ҳақда «Дарё» мухбири хабар бермоқда.
Вилоят ИИБ ЙҲХБ ва Қамчиқ довонидаги тоифаланган объектларни қўриқлаш қўмондонлигига қарашли ҳарбий қисм томонидан ташкилланган тадбир давомида йўловчилар ва ҳайдовчиларга «Шараф ленталари» тарқатилди. Иккинчи жаҳон уруши даврига оид ва замонавий қурол-аслаҳалар намойиш этилди.
Аскар ва зобитлар қўл жанги элементларини намойиш этди. Ҳарбий оркестр эса уруш даврига мансуб куй-қўшиқларни ижро этди.
Блиндажларда суронли йилларни ёдга солувчи дала ошхонаси ташкил этилди.
Тадбир нафақат маҳаллий аҳоли, балки довондан ўтаётган чет эллик сайёҳларга ҳам манзур бўлди.
