Андижон машинасозлик институтида «Бир макон - бир йўл» лойиҳасида иштирок этувчи Марказий Осиё мамлакатлари учун юқори малакали муҳандис кадрларни тайёрлаб берувчи «Замонавий муҳандислик» (Моdern Engineering School) халқаро факультети ташкил этилади. Бу ҳақда «Дарё»га институт матбуот хизмати хабар бермоқда.
Институт матбуот ва ахборот хизмати раҳбари Ҳайрулло Васиевнинг маълум қилишича, Ўзбекистон Президентининг 2018 йил 5 июндаги «Олий таълим муассасаларида таълим сифатини ошириш ва уларнинг мамлакатда амалга оширилаётган кенг қамровли ислоҳотларда фаол иштирокини таъминлаш бўйича қўшимча чора-тадбирлар тўғрисида»ги қарори ижросини таъминлаш доирасида институт ректори Ўктам Саломов бошчилигидаги делегация халқаро талаблар асосида хорижий тажрибаларни ўрганган ҳолда таълим тизимини жорий қилиш ва сифатини оширишда ўзаро ҳамкорликни янада ривожлантириш мақсадида жорий йилнинг апрель ойида расмий ташриф билан Хитойнинг Пекин ва Тианжин шаҳарларида бўлиб қайтган.
Ташриф давомида делегация аъзолари Шимолий Хитой технология университетининг бошқарув раиси жаноб Зенг Вентам ва вице-президенти Шен Зили хоним билан учрашган. Унда амалдаги қўшма таълим дастури, унинг амалиётга жорий этилиши ва икки томон манфаатларини инобатга олган ҳолда келажакдаги бажарилиш керак бўлган ишлар юзасидан фикрлар алмашилган ва ҳамкорлик алоқаларини янада ривожлантириш ва икки томонлама таълим тизимини жорий этиш мақсадида «Бир макон - бир йўл» лойиҳасида иштирок этувчи Марказий Осиё давлатлари учун юқори малакали мухандис кадрларни тайёрлаб берувчи иккила олий таълим муассасалари қошида «Замонавий муҳандислик» (Modern Engineering School) факультетини ташкил этишга келишиб олинган.
«Факультетни очишдан асосий мақсад икки давлат ўртасидаги таълим тизими ютуқларини уйғунлаштириш ва халқаро талабга жавоб берувчи юқори малакали кадрлар тайёрлашдан иборат бўлади, — дейди институт ректори Ўктам Саломов. – Факультетга келишувга мувофиқ бакалавриатнинг тўртта машинасозлик технологияси, мехатроника ва робототехника, сунъий интеллектуал тизимлар ва электрон ахборот мухандислиги таълим йўналиши бўйича ҳар йили 100 тадан талаба қабул қилинади ва улар 2+2, 3+1, 1+3, 4+0 моделлари асосида билим олиш имкониятига эга бўладилар. Шимолий Хитой технология университетида камида бир йил ўқиган талабалар икки томонлама диплом соҳиби бўладилар».
Шунингдек, янги факультетда магистратуранинг «Машинасозлик технологияси», «Мехатроника ва робототехника», ва «Электрон ахборот муҳандислиги» таълим мутахассислиги бўйича ҳар йили 30 тадан магистр 1+1 модели (биринчи йил Шимолий Хитой технологиялари университетида, иккинчи йил Андижон машинасозлик институтида) асосида таҳсил олиш имконияти яратилади.
Изоҳ (0)