Инновацион ривожланиш вазири Иброҳим Абдураҳмонов Фарғона политехника институтида водий университетлари проректорлари ва ўқитувчилари иштирокида учрашув ўтказди. Унда олимлар, профессорлар, докторантлар, мустақил тадқиқотчилар ва Фарғона Ёшлар инновация маркази вакиллари қатнашди. Бу ҳақда «Дарё»га вазирлик матбуот хизмати маълум қилди.
Иброҳим Абдураҳмонов 2019 йилдан бошлаб вазирлик устувор инновацион, илмий-тадқиқот, тажриба-конструкторлик ва стартап лойиҳалар танловлари натижаларига кўра ғолиб бўлган жами 59 та лойиҳани 45,4 миллиард сўм миқдорида молиялаштиришга киришганини қайд этди.
Инновацион ривожланиш ва новаторлик ғояларини қўллаб қувватлаш жамғармаси томонидан Фанлар академияси 2018 йилда тақдим этган рўйхатларга мувофиқ 6 та илмий-тадқиқот муассасасига 173 турдаги 7,2 миллион АҚШ доллари миқдоридаги илмий лаборатория асбоб-ускуналари харид қилиниши, жорий йил учун эса 11 та институтга 8,4 миллион доллар миқдоридаги лаборатория жиҳозлари харид қилиниши кўзда тутилгани таъкидланди.
—Авваллари бир олимга 30-40 миллион сўм миқдорида грантлар ажратилган бўлса, энди бу грантларнинг суммаси анчайин кўпайди. Ҳар бир олим ёки олимлар жамоасига 300 миллион сўмдан 1 миллиард сўмгача бўлган грантлар берилмоқда. Аммо талаб ҳам ошган. Энди олим мақола билан эмас, инновацион маҳсулот, янги технологиялар, ёки саноат намунаси билан ҳисобот бериши шарт қилиб қўйилди. Токи олимлар томонидан яратилган маҳсулот юрт иқтисодиётига фойда келтирсин, халқнинг турмуши янада фаровон бўлсин.
Фарғоналик олимлар ва докторантлар вазирлик томонидан эълон қилинаётган мавзуга доир грант танловларида иштироклари сустлиги, топшираётган лойиҳалари сони жуда кам эканлиги танқидий таҳлил қилинди ва камчиликлар кўрсатилди. Вазир уларни фаолроқ бўлишга ундади.
Изоҳ (0)