9 май — Хотира ва қадрлаш куни муносабати билан Қашқадарё вилоятининг Деҳқонобод туманида ер майдони 1 гектарни ташкил этувчи хотира майдонининг очилиш маросими бўлиб ўтди. Хотира майдонида шаҳрисабзлик ҳайкалтарош Шоҳрух Ўрозов қўли билан яратилган Мотамсаро она ҳайкали ҳам қад ростлади. Бу ҳақда «Дарё» мухбири хабар бермоқда.
Маълум бўлишича, 2019 йил 6 январь куни қурилиши бошланган хотира майдони Деҳқонобод Калий заводи ва туман ҳокимлигининг 1 миллиард 23 миллион сўм маблағи эвазига 3 ой давомида қуриб битказилган.
Тадбирда сўз олган вилоят ҳокими Зафар Рўзиев деҳқонободликларни Хотира ва қадрлаш куни арафасида очилган хотира майдонининг очилиши билан чин дилдан қутлаб, айни кунда кексалик гаштини сураётган 4 нафар деҳқонободлик отахонларга Президент совғаси 7,5 миллион сўм пул мукофоти ва эсдалик совғаларни топширди.
— Мана шундай эъзозда яшаётганимиз учун аввало юртбошимизга минг раҳмат, — дейди 17 нафар фарзанднинг отаси 97 ёшли уруш қатнашчиси Абдулҳаким бобо Жабборов. – Ким ўйлабди бундай қадр топамиз деб. Мен ва 5 нафар қишлоқдошим 1943 йил январь ойида урушга кетгандик. 1948 йил мен урушдан қайтдим. Биз кўрмаган қийинчилик ва машаққат қолмади ҳисоб. Шунинг учун ҳам бугунги тинч ва осойишта ҳаётимизга шукроналар айтамиз.
Деҳқонобод туман ҳокимлигининг маълумот беришича, Иккинчи жаҳон урушига тумандан 2767 нафар киши кетган бўлиб, шундан 2119 нафари қайтмаган.
— Янги очилган Хотира майдони ва унда қад ростлаган Мотамсаро она ҳайкали сиймосида урушга кетиб, қайтиб келмаган 2119 нафар юртдошларимизнинг онаизорлари сиймоси гавдаланган, — дейди туман ҳокими Зоир Алиқулов. – Ватан учун жонини фидо қилган ана шундай юртдошларимиз хотирасини абадийлаштириш, уларни ҳар доим ёдда сақлашимиз лозимлигини фарзандларимиз онгига сингдириб боришимиз керак. Шубҳасиз бу — бугунги кун талаби.
Тадбир сўнгида вилоят мусиқали драма театри актёрлари иштирокида Иккинчи жаҳон урушининг таҳликали дамлари саҳналаштирилди.
Тадбирдан сўнг туман ҳокимлиги вакиллари тадбирда иштирок этолмаган «Нодира» маҳалла «Альпомиш» кўчасида яшовчи 93 ёшли уруш қатнашчиси Инат Шарипов хонадонида ҳам бўлиб, Президент номидан топширилган 7,5 миллион сўм пул мукофоти ва совға-саломларини топширди.
Изоҳ (0)