Наманганлик Аброр Мансуров 2015 йил мартида Сергели туманида «Тошкент авто агент» масъулияти чекланган жамиятини давлат рўйхатидан ўтказади. Кейинчалик Нукусда ҳам жамият филиалини ташкил этади. Бу ҳақда жиноят ишлари бўйича Сергели туман судининг раиси Шуҳрат Бакаев маълум қилган.
Муқаддам судланиб, амнистия акти билан озод қилинган Аброр Мансуров автомобилларни 3 йилга кредитга бериши, бунинг учун 30 фоиз олдиндан тўлов қилиш кераклигини айтиб, пул ишлай бошлади. Шу тариқа 2015 йил февраль ойидан 2018 йилнинг августига қадар 112 нафар фуқарони салкам 3,1 миллиард сўмга чув туширди.
Улар орасида энг катта жабр кўргани Сурхондарё вилоятидаги «Жарқўрғон сифат таъмир қурилиш» хусусий корхонаси раҳбари З.Нормуратов бўлиб чиқди. Аброр унга 2017 йил 27 ноябрь куни имзоланган лизинг шартномасига асосан бир йил муддатда асфальт ётқизувчи техника воситасини олиб беришини айтган. Шунга мувофиқ, З.Нормуратов 30 фоизлик бошланғич бадал сифатида жамият ҳисоб рақамига 245 миллион сўм ўтказган ва шунча пулга куйиб қолаверган.
А.Мансуровга нисбатан Жиноят кодексининг 7 та моддаси билан жиноят иши қўзғатилди. Ушбу ишни кўриб чиққан жиноят ишлари бўйича Сергели туман суди унга нисбатан узил-кесил 8 йил ва 6 ой муддатга озодликдан маҳрум қилиш ҳамда энг кам ойлик иш ҳақининг 400 баравари — 73.720.000 сўм миқдорида жарима жазоси тайинлади.
Суд ҳукмида жабрланувчиларга етказилган 1,9 миллиард сўм ва 1100 АҚШ доллари миқдоридаги зарарни ундириш, жамият балансидаги баҳоси 678,7 миллион сўмлик 10 та автомашинани келтирилган зарарларни қоплашга қаратиш, жиноят предмети саналган 4 та автомашинани қонуний эгаларига қайтариш, жиноят предмети деб топилган 17 та автомашинани жабрланувчиларнинг номига расмийлаштириш ҳам ўз аксини топган.
Изоҳ (0)