Андижон шаҳрида жамоат тартибини таъминлаш, ҳуқуқбузарликлар профилактикаси ва жиноятчиликка қарши курашиш самарадорлигини янада ошириш мақсадида замонавий мобил постлар ҳамда ташвиш қурилмаларини ўрнатиш ишлари бошланди. Бу ҳақда вилоят ИИБ матбуот хизмати «Дарё»га хабар берди.
Ҳозирда 2 та мобил пост шаҳарнинг аҳоли кўп тўпланадиган Янги шаҳар ҳудудидаги Заҳириддин Муҳаммад Бобур ва Эски шаҳар ҳудудидаги Хотира ва қадрлаш майдонларига ўрнатилди.
Ушбу тадбир ҳуқуқбузарликлар профилактикасини амалга оширишда Андижон вилоятининг Андижон шаҳри ва Хўжаобод туманида «Намунали ҳудуд» тажрибасини яратиш доирасида амалга оширилмоқда.
«Ташкил қилинган мазкур постлар жамоат тартибини сақлашда ҳудудни назорат қилиб бориш орқали тегишли ташкилотларга тезкор хабар етказиш, шунингдек, фуқароларга ҳуқуқий маслаҳат беришда катта қулайлик туғдиради. Постлар компьютер техникалари, радио ва телефон алоқаси, видеоназорат қурилмалари ва бошқа зарур ускуналар билан таъминланган», — дейилади Андижон вилояти ИИБ матбуот хизмати хабарида.
Бу каби мобил постларни шаҳарнинг бошқа аҳоли гавжум жойларига ҳам ўрнатилиши режалаштирилган.
Изоҳ (0)