Ёнғин хавфсизлиги институти жамоаси Хотира ва қадрлаш куни муносабати билан уруш ва меҳнат фахрийларини табриклади (фото)

Ёнғин хавфсизлиги институти жамоаси 9 май — Хотира ва қадрлаш куни муносабати билан уруш ва меҳнат фахрийларини табриклади. Бу ҳақда институт матбуот хизмати хабар берди.

Институт жамоаси 28 апрель куни Олмазор туманидаги «Уруш ва меҳнат фахрийлари учун республика пансионати» ҳамда Оҳангарон туманидаги «Саховат» кексалар ва ногиронлиги бўлган шахслар учун интернат уйида истиқомат қилаётган жами 300 дан ортиқ Иккинчи Жаҳон уруши қатнашчилари, фронт орти, шунингдек, Афғон уруши ва Ленинград қамали иштирокчилари ҳамда меҳнат фахрийларини табриклаган. Уларга қимматбаҳо эсдалик совғаларни тақдим этган.

Институт ходимлари ва курсантлари томонидан ушбу «Саховат уйлари»даги барча кексаларга шараф ленталари тақиб қўйилган. Иккинчи Жаҳон уруши қатнашчилари, фронт орти ва Афғон уруши иштирокчиларига совғалар ва гуллар тақдим этилган.

Бундан ташқари, «Саховат уйлари»да ҳашарлар уюштирилиб, турли гул ва сабзавот кўчатлари экилди, ободонлаштириш ишлари амалга оширилган. Қайд этилишича, ҳашарлар ушбу «Саховат уйлари»да 4—5 май кунлари ҳам давом эттирилади.