Ўзбекистонда 2019 йилнинг уч ойида содир этилган жиноятлар сони ўтган йилнинг шу даврига нисбатан 3 043 тага ёки 31,6 фоизга камайди. Бу ҳақда ички ишлар вазири Пўлат Бобожонов ЎзАга берган интервьюсида маълум қилди.
Вазирнинг сўзларига кўра, жиноятчиликка қарши курашиш ҳамда ҳуқуқбузарликларнинг олдини олишга қаратилган янги тизим жорий этилган. Яъни, ҳар бир ҳудудда содир этилган жиноятлар бўйича кунлик тезкор маълумотларни ҳокимликлар томонидан кўриб чиқиш ва уларнинг барвақт олдини олиш бўйича тегишли чора-тадбирларни белгилаш учун тақдим этиб борилмоқда.
Шунингдек, Қорақалпоғистон Вазирлар Кенгаши раиси, вилоятлар ва Тошкент шаҳар, туманлар (шаҳарлар) ҳокимлари ҳар куни ўзига тегишли ҳудуднинг сутка давомидаги криминоген вазияти билан шахсан танишади ва биринчи навбатда ҳудудда содир этилган ижтимоий-маиший тусдаги жиноятларнинг сабаблари ва шароитларини ўрганади ҳамда уларнинг салбий оқибатларига барҳам бериш борасида таъсирчан чораларни кўриб, мазкур йўналишда шахсий назорат ўрнатиши йўлга қўйилган.
Пўлат Бобожоновнинг таъкидлашича, республика ҳудудлари жиноятчиликни жиловлаш бўйича янгича тизим асосида ички ишлар вазири, бош прокурори ва Миллий гвардия қўмондонига бириктирилиб, улар томонидан кундалик равишда бириктирилган ҳудудларда жамоат хавфсизлигини таъминлаш, бу борада ҳудудий ҳокимлик, ҳуқуқни муҳофаза қилувчи органлар ва жамоатчиликнинг биргаликдаги ҳаракатларини мувофиқлаштириш фаолияти йўлга қўйилди:
- бош прокурорга — Қорақалпоғистон Республикаси, Бухоро, Навоий ва Хоразм вилоятлари, шунингдек, Тошкент шаҳрининг Чилонзор тумани;
- миллий гвардия қўмондонига — Андижон, Наманган, Тошкент ва Фарғона вилоятлари, шунингдек, Тошкент шаҳрининг Олмазор тумани;
- ички ишлар вазирига — Жиззах, Самарқанд, Сирдарё, Сурхондарё, Қашқадарё вилоятлари бириктирилди.
«Шуни алоҳида таъкидлаш жоизки, жиноятчиликни жиловлаш борасидаги янги тизимга асосан, эндиликда ўзига бириктирилган ҳудудда жиноятчилик камайган, уларнинг олдини олиш ва бартараф этиш чора-тадбирларини ўз вақтида кўрган маҳалла фуқаролар йиғини раислари ва фаоллари, профилактика (катта) инспекторлари ҳамда ‘Маҳалла посбони’ жамоатчилик тузилмасининг алоҳида ўрнак кўрсатган аъзолари мунтазам равишда моддий рағбатлантириб борилади», — дейди Пўлат Бобожонов.
Қайд этилишича, жорий йилнинг уч ойида 4 мингдан ортиқ ходим рағбатлантирилди. Улардан 3 347 нафарини профилактика инспектори, 405 нафари маҳалла фуқаролар йиғини раиси ва 101 нафари маҳалла фаоли, 330 нафарини «Маҳалла посбони» жамоатчилик тузилмаси аъзоси, 48 нафарини «Фидокор ёшлар» патруллик гуруҳи аъзоси ва 67 нафарини фуқаролар ташкил этган.
Изоҳ (0)