Тошкентда совуқ сув нархининг ошгани ҳақида аҳолига бир кун ўтгач эълон қилинди 

Тошкентда 24 апрелдан эътиборан совуқ сувнинг нархи оширилди, дея хабар беради «Подробно».

Ажабланарли томони тарифлар кўтарилган ҳақида аҳолига 25 апрель куни эълон қилинган. Янги тарифлар Тошкент шаҳар ҳокимининг 2 апрель кунги қарори асосида жорий этилган. Яъни, пойтахт ҳокимлигида ушбу маълумотни аҳолига етказиш учун бир ой вақт бўлган.

Марказий иссиқ сув таъминоти бўлган кўп қаватли уй-жой аҳолиси учун 1 кубометр совуқ сув нархи 1050 сўм (аввал 850 сўм), марказий иссиқ сув таъминоти бўлмаганлар учун 715 сўм (аввал 615 сўм) этиб белгиланган.

Канализацияси мавжуд бўлган хусусий уй эгалари учун 1 кубометр сув 715 сўм (аввал — 615 сўм), канализациясиз — 380 сўм. Охирги ҳолат бўйича тариф ўзгартирилмаган.

Совуқ сувга умумий ставкада ҳисоблагичсиз тўлаётганларни катта ўзгаришларни кутмоқда. Улар учун 24 апрелдан 1 майга қадар икки марта нарх кўтарилади.

Шундай қилиб, 24 апрелдан бошлаб бир киши учун канализация, ички сув таъминоти, душ, ҳаммом ёки душ билан жиҳозланган уйларнинг фуқаролари 9083,15 сўм (аввал — 8933,22) тўлаши керак. 1 майдан эътиборан эса нарх иккинчи марта 10116,43 сўмга кўтарилади.

Канализация ва марказлаштирилган иссиқ сув билан таъминланган уй-жойлар ва умумий турар жойларда апрель ойида бир киши учун сув таъминоти 10263 сўмни (аввалги — 9937,13), май ойида эса 11944,63 сўмни ташкил этади.

Сув таъминоти, канализация ва марказлашган иссиқ сув билан таъминланган ётоқхоналарда апрель ойи бошида бир киши учун сув нархи — 5318,1 сўм (аввал — 5149,24 сўм), 1 майдан эса 6189,49 сўмни ташкил қилади.