Инновацион ривожланиш вазири академик Иброҳим Абдураҳмонов ва Шанхай фармакология институти раҳбари профессор Жингшан Шен ўртасида аҳдлашув баённомаси имзоланди. Бу ҳақда «Дарёга вазирлик матбуот хизмати маълум қилди.
Мазкур ҳужжатга кўра, Хитой консорциуми билан Ўзбекистонда турли дори воситаларининг субстанцияларини синтез қилиш бўйича йирик технологик платформа очишга келишилди. Бугунги кунда фармацевтика cубстанцияларини ишлаб чиқарилиши учун зарур инфратузилмаларни ташкил қилиш маҳаллий фармацевтика саноатини ривожлантиришнинг энг долзарб масалаларидан бири бўлгани боис бу платформанинг яратилиши соҳанинг ривожланишига, импорт ўрнини босувчи дори препаратларини арзон нархларда истеъмолчиларга етказиб беришга, экспорт маҳсулотларининг сонини оширишга хизмат қилади.
— Шу пайтгача Ўзбекистонда дори препаратларининг асосий субстанциялари хориждан олиб кирилмоқда, — дейди И. Абдураҳмонов. — Шу сабабли бизда субстанциялар синтезини йўлга қўйиш муҳим аҳамиятга эга. Ҳозир Биоoрганик кимё институтида ва Ўсимлик моддалари кимёси институтида дори воситаларининг субстанцияларини олиш бўйича ишлаб чиқариш йўлга қўйилган, бироқ айнан субстанцияларнинг синтезини амалга ошириш имконияти бўлмаган.
Дори препаратлари субстанциялари синтези билан шуғулланувчи Ўзбекистон — Хитой тиббий технологик паркини Навоий эркин индустриал-иқтисодий зонасида ташкил этиш кўзда тутилган бўлиб, бошланғич тўғридан-тўғри инвестиция миқдори муҳокама қилинмоқда.
Изоҳ (0)