22 апрель куни Қашқадарё вилоятининг Ғузор туманида ички ишлар органлари ходимлари одам савдоси билан боғлиқ жиноятни фош этди, деб хабар берди ИИВ Жамоатчилик ва ОАВ билан алоқалар бошқармаси.
«Жарариқ» маҳалласида яшовчи, муқаддам судланган Х.У. 17 март куни туғилган ўғлини фуқаро Н.Н. исмли аёлга тўрт миллион сўмга сотишга келишади. Аёл пулнинг бир миллион сўмини Хўжагузар маҳалласида олаётган вақтида ички ишлар органлари ходимлари томонидан қўлга олинди.
Ҳолат юзасидан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, 2 апрель куни Сурхондарёда икки кунлик чақалоғини икки минг долларга, 5 апрель куни Фарғонада 5 кунлик чақалоқни 500 долларга, 18 апрель куни Шаҳрисабзда 10 кунлик чақалоғини 10 миллион сўмга сотишга уринган аёллар қўлга олингани ҳақида хабар берилган эди.
Изоҳ (0)