Жорий ўқув йилида Ёшлар иттифоқи Қашқадарёдаги Олий таълим муассасаларида таҳсил олувчи 380 нафар талабанинг жами 1 миллиард 128 миллион 523 минг сўм миқдордаги тўлов-шартнома пулларини тўлаб берди. Бу ҳақда «Дарё»га Ёшлар иттифоқининг Қашқадарё вилоят кенгаши матбуот хизмати раҳбари Аҳрор Содиқов маълум қилмоқда.
Қарши шаҳрида айни шу муносабат билан ўртача ўзлаштириши 86 фоиздан юқори бўлган ҳамда муддатли ҳарбий хизматни ўтаб имтиёзли равишда ўқишга қабул қилинган талабалар учун тўлов-шартнома пулининг 35 фоизини тўлаб берилишига бағишланган сертификат топшириш маросими бўлиб ўтди.
Тақдирлаш маросимида Ўзбекистон ёшлар иттифоқи Қашқадарё вилоят Кенгаши раиси Шомурод Сатторов, Олий таълим муассасалари ректорлари, сертификатларни олишга муяссар бўлган 380 нафар талаба-ёшлар ҳамда уларнинг ота-оналари иштирок этди.
— Ўзбекистон Республикаси Президентининг 2017 йил 5 июлдаги «Ёшларга оид давлат сиёсати самарадорлигини ошириш ва Ўзбекистон ёшлар иттифоқини қўллаб-қувватлаш тўғрисида»ги фармонида белгилаб берилган устувор вазифаларнинг ижросини таъминлаш мақсадида 2017 йилдан бошлаб Ўзбекистон ёшлар иттифоқини Олий таълим муассасаларида аъло баҳоларда таҳсил олиб, ташкилотнинг фаол аъзоси бўлган талаба-ёшларга бир йиллик тўлов-шартнома пулининг 35 фоизи Ёшлар иттифоқи томонидан тўланиб келинмоқда, — дейди Иттифоқнинг вилоят Кенгаши бўлим мудири Улуғбек Султонов.
Маълум қилишларича, ушбу имтиёзнинг берилишида талаба-ёшларнинг ташкилот тизимида амалга оширган ишлари, фаолликлари, жамият ривожига қўшган ҳиссаси алоҳида инобатга олинган.
Изоҳ (0)