Халқ таълими вазирлигининг Ички аудит ва молиявий назорат бошқармаси томонидан 2019 йилнинг I-чораги давомида 1444 та ташкилот ҳамда мактабда жами 11 413,7 миллион сўмлик молиявий хато ва камчиликлар аниқланди. Бу ҳақда вазирлик ахборот хизмати хабар бермоқда.
Ўтказилган таҳлиллар натижасида ортиқча ва қўшимча режалаштирилган маблағлар 4 276,9 миллион сўм (аниқланган умумий маблағдан 37,5 фоизи), ҳақиқатда ишламайдиган ходимларга, ортиқча сақланган штат бирликлари ҳамда ишчи-ходимлар томонидан бажарилмаган иш ҳажмлари учун амалга оширилган тўловлар 2 071,7 миллион сўм (18,2 фоиз), малака тоифаларини белгилаш сертификатларини қалбакилаштириш ҳамда устама ва мукофот пулларининг ортиқча тўланиши натижасида аниқланган тўловлар суммалари 2 018,0 миллион сўмни (17,7 фоиз)ни ташкил этганлиги маълум бўлди.
Мазкур ҳолатлар бўйича таркибида жиноят аломатлари бўлган умумий суммаси 3 865,7 миллион сўмлик 190 та ўрганиш материали ҳуқуқ-тартибот органларига топширилиб, 279 нафар масъул шахсларга нисбатан қонунчиликда белгиланган тартибда интизомий чоралар кўрилди.
Бюджет қонунчилигини бузиш ҳолатлари профилактикасини таъминлашга қаратилган чора-тадбирлар натижасида аниқланган 3 023,4 миллион сўм миқдордаги ноқонуний сарфланган бюджет маблағлари белгиланган тартибда қайтарилди.
Изоҳ (0)