Ҳар йили дунё фотожурналистларининг World Press Photo танлови ташкил қилинади. Шу кунларда 2018-йилнинг энг сара асарлари маълум бўлди.
«Йил фотоси» деб Getty Images учун ишлайдиган Жон Мур асари эълон қилинди.
Ушбу сурат 2018 йил июнида АҚШ ва Мексика чегарасида тасвирга туширилган. Унда кўзининг олдида онаси тинтув қилинаётгани учун йиғлаётган қизалоқ акс этган.
World Press Photo танловининг «Янгиликлар» номинациясида Крис Магратнинг «Жамол Қошиқчининг ғойиб бўлиши» деб номланган иши ғолиб бўлди.
Суратда Саудия Арабистонининг Истанбулдаги элчилиги биноси дарвозасида репортёрларни ичкарига киришларига тўсқинлик қилаётган эркак акс этган. Шу лаҳзаларда терговчилар элчилик биносига кириб бораётган бўлган.
Танловнинг «Табиат» номинациясида Бенсе Матенинг «Қурбақа оёқларини йиғиш» деб номланган сурати биринчи ўринни олди. Унда оёқлари узилганидан сўнг сувга улоқтирилган қурбақалар акс этган.
«Портретлар» номинациясининг ғолиби Финбар О'Райлининг «Дакар модаси» асари бўлди.
«Спорт» йўналишида энг яхши деб Жон Педерсоннинг «Катангадаги бокс» фото сурати топилди. Сурат Уганда пойтахти Кампаланинг қашшоқлар мавзесидаги боксчилар клубида олинган.
«Атроф-муҳит» номинациясида Брент Стиртоннинг «Жасур Акашингалар» деб номланган иши ғолиб бўлди. Фотода «Акашинга» гуруҳининг аъзоси 30 яшар Петронелла Чигумбура акс этган. Фақат хотин-қизлардан ташкил топган бу гуруҳ Зимбабведа ҳайвонларни ноқонуний овлаётган браконерларга қарши кураш билан шуғулланади.
«Замонамиз муаммолари» номинациясида Диана Маркосяннинг «Кубанита» деб номланган сурати энг зўр деб тан олинди. Суратда Пура исмли қизнинг 15 ёшлик туғилган куни байрам қилинаётгани тасвирланган. Пурада шифокорлар мия ўсимтасини аниқлаган ва 13 ёшгача ҳам яшамайди, деб айтган эди.
«Йил фоторепортажи» номинациясида Питер Тен Хупен фотоси ғолиб чиқди. Унда АҚШга ўтишга уринаётган мигрантлар тасвирга туширилган.
Изоҳ (0)