«Ўзбекистон» халқаро анжуманлар саройида 15 апрель куни Ўзбекистонда Қозоғистон йилининг расмий очилиш маросими бўлди. Бу ҳақда Президент матбуот хизмати маълум қилди.
Маросимни Шавкат Мирзиёев очиб, қардош қозоғистонликларни Ўзбекистонга ташрифи билан қутлади.
— Ўзбекистонда Қозоғистон йилининг очилиши стратегик шериклик муносабатлари тобора мустаҳкамланиб, ишонч ва ўзаро қўллаб-қувватлаш кучайиб бораётганидан далолат беради. Ушбу муҳим воқеа халқларимиз ўртасидаги абадий ва самимий дўстлик, маданий ва маънавий яқинлик рамзидир, — деди Шавкат Мирзиёев.
Ўзбек ва қозоқ халқлари азалдан бир-бирига таянч бўлиб, қийинчиликларни енгиб ўтгани, бугунги кунда халқларнинг умумий келажагини ҳам биргаликда бунёд этаётгани таъкидланди.
— Бугунги кун Ўзбекистон ва Қозоғистон муносабатларида янги, тарихий кун сифатида халқларимиз ўртасидаги қардошлик алоқаларини ривожлантириш учун мустаҳкам замин яратади, деб ишонаман, — деди давлат раҳбари.
Маълумки, 2018 йилда Қозоғистонда Ўзбекистон йили деб эълон қилинган эди. Ушбу сана доирасида маданият, санъат, адабиёт, илм-фан, туризм ва бошқа соҳаларда 100 дан зиёд тадбир ўтказилди. Театр ва фолклор жамоалари, эстрада хонандаларининг ижодий сафарлари уюштирилди. Олмаота шаҳрида ўзбек адабиёти кунлари, Тараз, Чимкент, Қизилўрда, Туркистон шаҳарларида ўзбек киноси кунлари бўлиб ўтди.
Қозоғистон президенти Қосим-Жўмарт Тўқаев Ўзбекистонда қозоқ тили ва маданиятини ривожлантиришга қаратилаётган эътибор учун миннатдорлик билдирди. Қозоғистон йили доирасида ўтказиладиган тадбирлар қардош халқлар маданий алоқаларини янада мустаҳкамлашини қайд этди.
Мамлакатда Қозоғистон йилига катта тайёргарлик кўрилди. Унинг доирасидаги тадбирлар санъат, фан, таълим ва тадбиркорлик соҳалари вакилларига ўзаро манфаатли алоқаларни йўлга қўйиш, билим ва тажриба алмашиш учун янги уфқлар очади. Маданиятлар бир-бирини бойитишига, халқлар янада яқин бўлишига хизмат қилади.
Очилиш маросими катта концерт дастури билан давом этди.
Изоҳ (0)