Андижон шаҳрининг «Ўзбегим» маҳалласида жойлашган собиқ консерва заводи ўрнида қурилиб битказилган 6 та етти қаватли уй жойдаги янги хонадонларга 252 та оила кўчиб ўтди. Бу ҳақда «Дарё»га вилоят ҳокимлиги матбуот хизмати маълум қилди.
Ушбу бинолар «Xokon avtoinvest» ҳамда «Radius servis» масъулияти чекланган жамиятлари қурувчилари томонидан қисқа муддат ичида бунёд этилди. Уларни фойдаланишга топшириш маросимида иштирок этган вилоят ҳокими Шуҳратбек Абдураҳмонов жорий йил охирига қадар якунланиши кутилаётган Андижон шаҳрининг Навоий, Чўлпон шоҳкўчалари, Дукчи Эшон кўчасидаги эски уйлар ўрнида 7 ва 12 қаватли 150 та замонавий турар жой барпо этишга киришилганини билдирди.
«Xokon avtoinvest» МЧЖ иш юритувчиси Йўлдошхон Зуҳриддиновнинг айтишича, қурилиш ишларига олти ой сарфланган. Шу вақт ичида ушбу хонадонларда яшовчи аҳоли учун маиший хизмат кўрсатиш шаҳобчалари, компьютер маркази, китоб дўкони, аёллар учун фитнес клуби ҳамда иккита болалар майдончаси ҳам қуриб битказилди. Шунингдек, ҳудуд ободонлаштирилиб, намунавий кўринишга келтирилган.
—Уч нафар ўғлимни ёлғиз катта қилдим, — дейди иккинчи гуруҳ ногирони Дилфузахон Умарова. — Иккисини уйладим. Кенжатойим мактабда ўқимоқда. Шароитимиз қийинлиги боис тўнғичим ижарада турар эди. Ўзимга қолса бир хонали уйни ҳам тиккалай олмасдим. Бугун ҳурсандчилигим чексиз.
Маълумот учун, вилоят марказида жойлашган собиқ консерва заводи ўрнида 2017 йилда 5 та, 2018 йилда 9 та шундай замонавий турар жой барпо этилган.
Изоҳ (0)