Шаҳрисабз шаҳар «Кеш» маҳалла фуқаролар йиғини биносида 1992 йил туғилган Қ.Ш. ва 1994 йилда туғилган А.А.ларнинг милиция ходимларига оммавий равишда бўйсунмасликни келтириб чиқариш мақсадида атайин сохта уйдирма тарқатган қилмиши сайёр суд мажлисида кўриб чиқилди. Бу ҳақда «Дарё»га Қашқадарё вилоят Йўл ҳаракати хавфсизлиги бошқармаси матбуот хизмати раҳбари Жавлон Бахтиев маълум қилмоқда.
Вилоят йўл ҳаракати хавфсизлиги бошқармаси матбуот хизмати хабарига кўра, фуқаролар Қ.Ш ва А.А лар Шаҳрисабз шаҳрида ўз хизмат вазифасини бажараётган йўл ҳаракати хавфсизлиги инспекторлари Жўрабек Тўхтаев ҳамда Бекзод Хўжақуловлар фаолиятига тўсқинлик қилиб, ходимнинг ўз вазифасини бажаришга тааллуқли қонуний талабларини бажармасликка оммани даъват қилган. Бу ҳам етмаганидек оммани чалғитиш мақсадида интернетда ёлғон маълумот тарқатган.
2-отряд 1-сафарбарлик гуруҳи командири, лейтенант Шахтиёр Отақуловнинг «Дарё»га қўшимча қилишича, ҳайдовчи А.А 2019 йил 7 март куни ўз хизмат вазифасини бажараётган ходим Жўрабек Тўхтаев ишига қаршилик кўрсатган бўлса, фуқаро Қ.Ш 21 март куни ЙПХ ходими Бекзод Хўжақулов фаолиятига тўсқинлик қилиб, ҳолатни атайин нотўғри талқин қилувчи видоэсъёмка орқали ИИБ ходимларини обрўсизлантиришга интилган.
Сайёр судда фуқаролар Қ.Ш ва А.А.ларга 7 суткадан қамоқ жазоси тайинланиб, судланувчиларнинг қамоқда ўтирган ҳар бир куни учун энг кам иш ҳақининг 15 фоизи миқдорида ҳар биридан давлат фойдасига 212 863 сўм миқдорида маблағ ундирилиши белгиланган.
Изоҳ (0)