Ички ишлар вазирлиги Транспортда хавфсизликни таъминлаш бош бошқармаси ва «Ўзбекистон темир йўллари» ҳамкорлигида Тошкент марказий вокзалидан Сирдарё вилоятига қадар бўлган йўналишда «Темир йўлларда хавфсиз кун» тадбири ўтказилди. Бу ҳақда «Дарё» мухбири хабар бермоқда.
Тадбирга жалб этилган 110 нафар ходим 13 гуруҳга бўлинган ҳолда темир йўл бекатлари, темир йўлга яқин жойлашган хонадон ва таълим муассасаларида тушунтириш, тарғибот ишларини олиб борди.
«Тўрт фарзандни темирйўл ёқасида катта қилдим. Темирйўлни панжара билан ўраб яхши қилишди. Авваллари кўнглим хижил бўлиб ўтирардим. Тез-тез келиб тушунтириш беришмоқда. Невараларимга ҳам мактабда поезд келаётганда, йўлда ўтишда эҳтиёт бўлиш кераклиги ҳақида тушунтиришибди», — дейди Зангиота туманидаги Гулбоғ маҳалласида яшовчи Дилбар Шаматова.
Шунингдек, ўзбошимчалик билан қилинган пиёдалар ўтиш жойлари, ноқонуний қурилмалар ва чиқиндилар олиб ташланди. Йўналишда қўриқланадиган ва қўриқланмайдиган кесишмалар созлиги темир йўл мутахассислари билан ҳамкорликда текширилиб, аниқланган камчиликлар масъул ходимлар томонидан жойида бартараф этилди.
Изоҳ (0)