Хоразм вилояти Ҳазорасп тумани ИИБ профилактика инспекторлари хизматда фойдаланиш учун махсус сумка ва планшетлар билан таъминланди. Бу ҳақда Хоразм вилояти ИИБ матбуот хизмати «Дарё»га хабар берди.
Ҳазорасп туманида 2018 йил давомида умумий жиноятлар 39 фоизга, жорий йилнинг биринчи чораги давомида ўтган йилнинг шу даврига нисбатан 23 фоизга камайгани боис профилактика инспекторлари рағбатлантирилган.
Ҳазорасп тумани ҳокимлиги томонидан туман ички ишлар бўлимининг 30 нафар профилактика (катта) инспекторларига махсус жиҳозланган хизмат сумкаси ва замонавий планшетлар ажратилган.
2019 йилнинг 5 апрель куни профилактика инспекторларига хизмат сумкаси ва планшетларни топширишга бағишланган тантанали тадбирда, тумандаги сектор раҳбарлари, ИИВ ва вилоят ИИБ масъул ходимлари иштирок этган.
Биринчи тиббий ёрдам кўрсатишда асқотадиган дори-дармонлар, ёзув қуроллари, ўзбекча-русча-инглизча сўзлашгичлар билан жиҳозланган махсус хизмат сумкалари ва ички ишлар органларидаги базавий дастурлар билан таъминланган планшетлар профилактика инспекторлари хизмат фаолиятида қулайлик яратади.
Изоҳ (0)