Xorazm viloyati Hazorasp tumani IIB profilaktika inspektorlari xizmatda foydalanish uchun maxsus sumka va planshetlar bilan ta’minlandi. Bu haqda Xorazm viloyati IIB matbuot xizmati “Daryo”ga xabar berdi.
Hazorasp tumanida 2018-yil davomida umumiy jinoyatlar 39 foizga, joriy yilning birinchi choragi davomida o‘tgan yilning shu davriga nisbatan 23 foizga kamaygani bois profilaktika inspektorlari rag‘batlantirilgan.
Hazorasp tumani hokimligi tomonidan tuman ichki ishlar bo‘limining 30 nafar profilaktika (katta) inspektorlariga maxsus jihozlangan xizmat sumkasi va zamonaviy planshetlar ajratilgan.
2019-yilning 5-aprel kuni profilaktika inspektorlariga xizmat sumkasi va planshetlarni topshirishga bag‘ishlangan tantanali tadbirda, tumandagi sektor rahbarlari, IIV va viloyat IIB mas’ul xodimlari ishtirok etgan.
Birinchi tibbiy yordam ko‘rsatishda asqotadigan dori-darmonlar, yozuv qurollari, o‘zbekcha-ruscha-inglizcha so‘zlashgichlar bilan jihozlangan maxsus xizmat sumkalari va ichki ishlar organlaridagi bazaviy dasturlar bilan ta’minlangan planshetlar profilaktika inspektorlari xizmat faoliyatida qulaylik yaratadi.
Izoh (0)