Бугун 3 апрель куни Халқаро Пресс-клубнинг «Ўзбекистонда йўловчи ташишнинг янги тартиблари: замонавий ёндашувлар ва муаммолар таҳлили» мавзусидаги навбатдаги сессияси бўлиб ўтди, деб хабар берди «Дарё» мухбири Севара Нишонова.
Давлат солиқ қўмитаси раисининг биринчи ўринбосари Мубин Мирзаевнинг маълум қилишича, Тошкент шаҳрида 5 мингта қонуний лицензия билан фаолият юритаётган ҳайдовчилар бор. Вилоятларда эса бу кўрсаткич юқори.
Мубин Мирзаев шу ўринда Ўзбекистонда бир йилдан бери фаолият юритаётган «Яндекс.Такси» компанияси солиқ тўловчи сифатида рўйхатдан ўтмагани ва давлатга солиқ тўламаётганини маълум қилди:
« ‘Яндекс.Такси’ Ўзбекистонга солиқ тўламайди. Уларнинг бренди асосида фаолият юритадиган ҳайдовчилар ҳам давлатга солиқ тўламайди. Ва сервиснинг 10 мижозидан қарийб ҳеч ким солиқ тўламайди. Ягона йўл тизимни тартибга солиш керак. Компания солиқ тўловчи сифатида рўйхатдан ўтиши лозим. Шундан сўнг у ҳайдовчиларда лицензия бор-йўқлигини назорат қилиши керак».
Транспорт вазирлиги департамент бошлиғи Руслан Рўзметовнинг айтишича, ҳозирда Ўзбекистонда лицензияли такси ҳайдовчилари учун қатор қулайликлар яратилган:
«Ҳозирда лицензияли таксичилар учун қўшимча қулайликлар яратилган. Улар тўхташ мумкин эмас жойларда вақтинча тўхташга рухсат этилади ҳамда якка тартибдаги тадбиркорлар ўзларига яқин ҳудуддан махсус лицензия олиш имконияти яратилган».
Қайд этилишича, 2017 йилда Ўзбекистонда 17900 нафар, 2018 йилда 24700 нафар таксичи ушбу фаолият тури учун лицензия олган.
Изоҳ (0)