2 апрель куни Ўзбекистон Президенти халқ қабулхонаси томонидан Бухорода ташкил этилган оммавий қабул жараёнида Ички ишлар вазири Пўлат Бобожоновнинг сайёр қабули ташкил этилди.
Бухоро вилоят ИИБ матбуот хизмати раҳбари Қувват Ярашовнинг «Дарё»га хабар беришича, сайёр қабулнинг дастлабки куни Бухоро шаҳар 3-сектор штабида бўлиб ўтган.
Ички ишлар вазири Бухоро ва Когон шаҳри, Когон, Жондор, Қоракўл, Олот ва Қоровулбозор туманларида яшовчи фуқаролар билан очиқ мулоқот ўтказган. Сайёр қабулда 149 нафар фуқародан уй-жой олиш ва уй-жой қурилишидаги муаммолар, меҳнат ва бандлик масалаларининг ечим топмаётгани, фуқароликни қабул қилиш ва фуқароликдан чиқиш, паспорт олиш ва пропискага ўтиш, шунингдек, ногиронликдан азият чекиш, пенсия таъминоти ва болалар нафақасини олиш каби соҳаларга оид мурожаатлар тушган.
Маълум бўлишича, шундан 89 та ижтимоий-ҳуқуқий ва маиший, 32 та собиқ ички ишлар органлари ходимларини ишга қайта тиклаш, 15 та суриштирув ва тергов, 4 та фуқаролик ва паспорт-виза, 5 та маҳкумнинг ҳуқуқий ҳолати масалаларига оид мурожаатлар қабул қилинган. Сайёр қабул жараёнининг биринчи куни 59 та мурожаат ўз жойида ҳал этилиб, 89 та мурожаатнинг қайта кўриб чиқилиши назоратга олинган. 6 нафар мурожаат эгасига асослантирилган ҳуқуқий тушунтириш берилган.
Сайёр қабул жараёнида бевосита ички ишлар тизимига даҳлдор 10 та мурожаат асосида дастлабки тергов ҳаракатлари қайта тикланган. 5 та ҳолат юзасидан эса қўшимча суриштирув ўтказиш тўғрисида тақдимномалар киритилган. Тадбиркорлик билан шуғулланиш мақсадида мурожаат қилган 3 нафар фуқарога имтиёзли кредит маблағларини ажратиш бўйича ҳужжатлар расмийлаштирилган. 2 нафар маҳкум яшаш ҳудудига яқин бўлган жазони ижро этиш муассасаларига ўтказилган бўлса, 1 нафар хорижий фуқаро ҳамда 1 нафар фуқаролиги бўлмаган шахсларга Ўзбекистон Республикасида яшаш гувоҳномалари расмийлаштириб берилган.1 нафар фуқаронинг Ўзбекистон фуқаролигини қабул қилиш бўйича ҳужжатлари расмийлаштирилган.
— Мен Бухоро шаҳрида яшайман. Аммо Ўзбекистоннинг ҳақиқий фуқароси эмаслигим юрагимда кемтик эди. Бугунги сайёр қабул орзу-армонларимни ушалтирди. Ўзбекистон Республикаси паспортини қўлимга олдим. Шундай имкониятлар яратиб берилгани учун Ички ишлар вазирлигига ўз миннатдорлигимни билдираман, — деди Олим Равшанов.
Сайёр қабулда 4 нафар фуқарога ўзбошимчалик билан қурилган уй-жойларни қонуний расмийлаштириш учун маҳаллий ҳокимиятнинг қарорлари чиқариб берилган.
Сайёр қабул давомида мустақил юра олмайдиган 5 нафар фуқарога ногиронлик аравачаси ҳамда эшитиш қобилияти суст бўлган 3 нафар фуқарога махсус эшитиш мосламаси берилган. Бундан ташқари, 15 нафар фуқарога Бухоро вилоят Бандлик бош бошқармаси орқали ишга жойлашиши учун йўлланмалар берилган.
Шунингдек, Ўзбекистон Президентининг ПҚ 3680-сонли қарори асосида 3 нафар фуқаролар ўз томорқа ерларига бириктирилиб, уларга меҳнат дафтарчалари очилган ҳолда иш билан таъминланган.
Эслатиб ўтамиз, Ички ишлар вазирининг Бухородаги сайёр қабули бугун, 3 апрель куни Вобкент туманидаги Халқ қабулхонаси биносида Бухоро, Вобкент, Ғиждувон, Шофиркон, Ромитан ва Пешку туманларида истиқомат қилувчи фуқаролар билан ўтказилмоқда.
Изоҳ (0)