Алина Кабаева Тошкентда кечган болалигини хотирлади

Афинада бўлиб ўтган Олимпиада—2004 мусобақаси чемпиони ва бадиий гимнастика афсонаси Алина Кабаева Ўзбекистонда кечган болалик даврлари ҳамда спортга қўйган илк қадамлари ҳақида сўзлаб берди.

Мен кўпмиллатли шаҳарда туғилиб, вояга етганман. Ҳовлимизда турли миллатга мансуб оилалар яшар эди. Шу қадар иноқ бўлганмизки, бунда ҳар биримизнинг бахтиёр онларимиз барча учун шод-у хуррамликка айланар, қийин дамларда эса ҳеч ким ўз муаммоси билан ёлғизланиб қолмас эди. Қўшнилар ҳамиша бир-бирини қўллаб-қувватлар ва ёрдам берарди. Одамлар ўртасидаги муносабатлар самимий ва дўстона эди. Албатта, жанжаллар ҳам бўлган, лекин бундай ҳолатларда ҳам бир-бирига нисбатан нафрат бўлмаган.

Ўз вақтида дадам Днепропетровскдаги «Днепр» футбол жамоасида тўп сурган. У ерда фигурали учиш спорти анча яхши ривожланган эди. Мен ўша вақтда уч ёшда бўлганман, онамларга спортнинг бу тури жуда ёққани учун мени фигурали учишга берган бўлишармиди?

Ойимлар ҳали мен дунёга келмасимдан бу спорт тури билан таниш бўлганлар, нега деганда, у киши ўйнаган баскетбол жамоаси гимнастикачилар билан битта залда шуғулланишган. Ирина Александровна Винернинг машғулотларини кузатган ойим, ўша вақтнинг ўзидаёқ, агар келажакда қиз фарзанд кўрсам, уни албатта, бадиий гимнастикага ва фақат шу мураббийга беришини дилига мақсад қилиб тугиб қўйган.

Энг завқли хотираларим Япония билан боғлиқ. 1994 йил бошида мен Осиё чемпионатига Қозоғистондан (ўша вақтда Павлодарда яшаганмиз, дадам «Трактор» футбол жамоасида тўп сурарди) борганман. Орадан бир йил ўтиб Ирина Александровна қўлида шуғулланишни бошладим ва 1996 йил Россия термаси аъзосига айланиб, Японияга қайтганман ва ёшлар ўртасида жаҳон чемпионати ғолиби бўлганман. Ҳатто мураббийим ҳам бундай бўлишини кутмаган. Мен ўз олдимга ўшанда энг кучли гимнастикачилар 30 талигига киришни мақсад қилиб қўйгандим», — деб хотирлайди Алина «Аэроэкспресс» журнали мухбири билан кечган суҳбатда.