АҚШда Ўзбекистоннинг Нью-Йорк шаҳридаги бош консуллиги ва Туризмни ривожлантириш қўмитаси ватандошлар ҳамкорлигида Ўзбек-Америка ассоциациясининг 10 йиллиги кенг нишонланди. Бу ҳақда қўмита матбуот хизмати хабар берди.
Унда АҚШнинг йирик штатларида истиқомат қилувчи 250 нафардан ортиқ ватандош, маҳаллий аҳоли ва оммавий ахборот воситалари иштирок этди.
Тадбирда сўз олган ташкилотчилар иштирокчиларни Наврўз билан табриклаб, уларни Ўзбекистоннинг туризм салоҳиятини тарғиб қилиш ҳамда турли лойиҳаларда фаол иштирок этишга чақирди.
Сумалак, кўк сомса, палов каби байрам таомлари тайёрланиб, тадбир иштирокчиларга улашилди. Шунингдек, халқ ҳунармандчилиги намуналари намойишга қўйилди, Ўзбекистоннинг туризм салоҳиятини акс эттирувчи тарғибот материаллари тарқатилди.
Миллий куй-қўшиқлар, гўзал анъанавий рақслар, ўзбек мактаби болалари томонидан ижро этилган ранг-баранг дастурлар тадбир иштирокчиларига кўтаринки руҳ бағишлади.
АҚШда истиқомат қилувчи кўплаб ватандошлар қўмита билан ҳамкорлик қилиш истагини билдирди.
Изоҳ (0)