«Дарё» жаҳон матбуотида охирги кунларда кўтарилган асосий мавзуларга тўхталиб ўтади.
Путин Россияга иммигрантлар оқимини кўпайтирмоқчи
Швейцариянинг Le Temps нашри ўтаётган ҳафтада Россиядаги демографик вазиятнинг ёмонлашуви Кремлнинг мамлакатга миллионлаб рус тилли одамларни жалб қилишга мажбур қилаётгани ҳақида ёзди. «Коммерсантъ» газетаси ҳам ўтган ҳафта расмий Кремль Россияга 5 миллиондан 10 миллионгача иммигрантни жалб қилиши борасида хабар тарқатган эди. Дастурга мувофиқ, Путин ҳукумати миграция сиёсатини устувор сиёсат деб билиб, ҳаракатлар режасини имзолаган ва бу дастурни амалга ошириш учун идоралараро комиссия тузишга буйруқ берган. Бир нарсани назардан қочирмаслик керак: гап фақат собиқ шўро республикаларидан келаётган рус тилини яхши билмайдиган иммигрантларни қабул қилиш ҳақида кетмоқда.
Режанинг мақсадга мувофиқлиги борасида шубҳа йўқ, сабаби Россияда демографик вазият оғир. 2018 йилда Россия аҳолиси биринчи марта 146,8 миллион нафарга тушиб қолди. Ишга яроқлилар ва нафақадагилар ўртасидаги мутаносиблик салбий тус олган. Ҳукумат олиб броган туғишни рағбатлантириш сиёсати барбод бўлди. Мамлакатнинг иқтисодий ҳаёти эса фақатгина иммигрантларга боглиқ бўлиб қолмоқда. Миллионлаб янги ватандошларга эга бўлиш учун Россияда юқори ҳаёт даражаси таъминланишива инфратизим яратиш учун жиддий қадамлар ташланиши талаб этилади.
«Аммо, деб ёзади Le Temps, Россия иқтисодиёти 2013 йилдан бери қисқариб бормоқда ва иммигрантлар сони ҳам ҳар қачонгидан кам».
Устига-устак Россиядаги миллатчилик ва ксенофобиянинг кучайиб бораётгани ҳам иммигрантлар сонининг камайишига туртки бўлмоқда. Россияга ишга кетаётган собиқ шўро республикалари аҳолиси асосан мусулмонлардан иборат.
Мазкур дастурнинг иш бериши ҳам анча мураккаб, чунки Путин ҳокимият тепасига келгач, рус ватандошларини мамлакатга қайтариш борасида анча дастурлар қабул қилди, аммо уларнинг барчаси муваффақиятсизликка учради.
АҚШ учун асосий хавфлар нималардан иборат?
The New York Times нашри АҚШ ички хавфсизлик вазири Кирстен Нильсеннинг мамлакат учун асосий хатар нимадан иборат эканлиги борасидаги баёнотини чоп этди. Вазир асосий хавф киберхатарлардан иборат эканлиги ва бу ҳеч ҳам президент Дональд Трамп эълон қилган фавқулодда вазият билан боғлиқ эмаслигини таъкидлаган.
«Кибермакон бир вақтнинг ўзида ҳам хавф ўчоғи, ҳам қурол, ҳам нишон бўлиб қолмоқда», — деган Кирстен Нильсен.
Ички хавфсизлик вазирлиги иммиграция агентлари ва божхона ходимлари устидан назоратни амалга оширади, улар эса Трамп учун ноқонуний иммиграсияга қарши курашнинг олдинги қаторида туради. Аммо ички хавфсизлик вазири киберҳужумлар хавфли эканлигига урғу берди.
Нилсен ўз баёнотида расмий Кремль ва Путинни танқид қилар экан, айнан улар америкача демократия тамойилларига путур етказаётганини таъкидлайди. Вазирнинг фикрига кўра, ўртача ҳисобда америкалик фуқаро ёки АҚШ компанияси Россия, Хитой, Эрон ва Шимолий Корея тарафидан уюштирилаётган киберҳужумларга дош бера олмайди. Вазир қора ниятлиларнинг учоқларни ўғирлашидан кўра интернет тармоқларини бузиб кираётганлардан кўпроқ хавфсирашини билдирган.
The New York Times нашрининг ёзишича, Нильсен ўзи бош бўлган вазирлик 2020 йилда бўлиб ўтадиган президентлик хавфсизлигини таъминлашига ишонади. Шу билан бирга, вазирлик ходимлари АҚШ рақамли тармоқларини бузишга уринганларни таъқиб қилишда давом этади.
«Мени қора ниятли кучларнинг нима қилганликлари эмас, аксинча, нима қилишлари мумкинлиги кўпроқ хавотирга солади», — деган Кирстен Нильсен хоним.
Путин Назарбоевдан ўрнак оладими?
Le Figaro нашрининг ёзишича, эски совет кадри Назарбоев президентлик сайловидан бир йил олдин воз кечиб, Марказий Осиё сарҳадларидан четроққа, Кремлгача ўзига хос сигнал берди. 2024 йилда Путин ҳам ўз ваколатларини тугатиши керак. У Назарбоевдан ўрнак оладими?
Назарбоев бюджетдаги қийинчиликлардан қочиб, ўзига фақат стратегик аҳамиятга эга бўлган ваколатларнигина қолдирди ва ўз қизи — 55 ёшли Дариға Назарбоевани сенат раҳбари қилиб тайинлади.
Кремлшуносларнинг фикрича, Путин бундай қилмайди, чунки Россия президенти, озроқ бўлса-да, шахсга сиғиниш тарафдори ва икки қизини жамоатчилик назаридан панада тутиб келмоқда.
«Кремль раҳбари янгича ва кутилмаган қарорлар қабул қилишни хуш кўради», — дейди мустақил эксперт Аркадий Дубнов. Лекин «ёруғ султон» Назарбоевнинг баёнотидан сўнг Кремль раҳбарининг бундай қарорга келиш истаги имконияти анча қисқарди. Миш-мишларга кўра, жаноб Путин корпоратив раҳбар сифатида Россия ва Беларусь иттифоқ давлатини бошқармоқчи. 24 йилдан бери ҳокимиятда қолаётган Александр Лукашенко эса иккинчи ўринда қолишни истамайди. Лукашенко оғли ҳали анча ёш пайтиданоқ уни сиёсий майдонга олиб чиқа бошлаганди.
Британия матбуотида нима гаплар? Тереза Май бош вазирлиги ниҳоясига етмоқда
Тереза Мэй Европа Иттифоқига Brexit’ни июнь ойи охиригача кечиктиришни сўраб мурожаат қилди. Европа Иттифоқи икки ой муддат берди.
The Daily Mail нашрининг ёзишича, энг ёмони Тереза Мэй ҳануз бош вазир эканлиги, Британиянинг Brexit’га ўхшамаган вариантга келганлиги, ёки Brexit жараёнининг умуман рўй бермаслигидир.
Парламентдаги айрим Brexit’чи депутатлар ҳеч қандай битимларсиз Европа Иттифоқидан чиқилса ёмон бўлмас эди деган фикрда. Аммо бу янглиш фикрдир.
Депутатларнинг учдан икки қисми Brexit’га қарши. Улар битимсиз Европа Иттифоқидан чиқишга йўл қўймайди.
Brexit’чилар Тереза Мэй эришган битим ёмон эканини тан олади, лекин улар имкон берилса, овоз беришга тайёр. Brexit’чилар Европа Иттифоқидан имкон борида ажраб олмоқчи.
Тереза Мэй ҳозирда ўз партиясини тўлиқ назорат қила олмаяпти. Парламент учинчи марта рад жавоби берса, Британия ҳеч қандай битимсиз Европа Иттифоқидан чиқади ёки Brexit узоқ муддатга ортга сурилади.
Тереза Мэй энди тўғридан тоғри Британия халқига юзланмоқчи. Бу Британия учун кам кузатиладиган ҳодиса. Мэй 29 майда албатта Европа Иттифоқидан чиқамиз деб ҳозиргача 198 марта ваъда берган. Агарда бош вазир учинчи бор парламентда ютқазса, унинг сиёсий фаолияти тугайди.
Изоҳ (0)