Покистонда қор қоплони саккиз ёшли болани ғажиб ташлади. Бу ҳақда Menafn ахборот портали хабар бермоқда.
18 март куни Хайбер-Пахтунхва вилоятининг Чанати қишлоғида яшовчи Суфиян исмли бола уйининг ҳовлисида ўйнаётган пайтида тўсатдан, қор қоплони болага ҳужум қилди ва уни судраб кетди. Боланинг жасади кечқурун қишлоқнинг чеккасида жойлашган жарликдан топилган.
Боланинг ўлимидан сўнг, қишлоқ аҳолиси ҳокимиятдан одамларнинг хавфсизлигини таъминлаш учун қор қоплони ва бошқа йиртқичларнинг ҳаракатини диққат билан кузатиб боришни сўради. Уларнинг кўпчилиги Қизил китобга киритилган.
Маҳаллий фуқаро Сардор Муҳаммад Иқбол қишнинг оғир қорлари туфайли илвирслар қишлоқ яқинига кўчган бўлиши мумкинлигини тахмин қилмоқда. У йиртқич ҳайвонлар мол-мулкларни вайрон қилиб, одамлар ва чорва учун таҳдид солаётганидан шикоят қилиб, ҳукуматдан кузатув камераларини ўрнатишни талаб қилди.
Қор қоплони ёки илвирс, Марказий Осиё тоғларида тарқалган. Улар камдан-кам одамларга ҳужум қилади. Бу тур йўқолиб кетиш арафасида — браконерлар қор қоплонларини мўйнаси учун овлашда давом этмоқда.
Изоҳ (0)