Абдулла Авлоний номидаги халқ таълими раҳбар ходимларини қайта тайёрлаш ва малакасини ошириш институтида Халқ таълими вазирлиги раҳбарияти ҳамда фахрийлар билан давра суҳбати бўлиб ўтди. Бу ҳақда вазирлик ахборот хизмати маълум қилди.
Давра суҳбатида соҳада узоқ йиллар давомида фаолият олиб борган фахрийлар, аввалги халқ таълими вазирлари, академиклар иштирок этди.
Тадбирда халқ таълими тизимида олиб борилаётган ислоҳотлар, таклифлар муҳокама қилинди. «Ўқитувчи мақоми тўғрисида» қонуни қабул қилиниши кутилаётгани, мазкур ҳужжат ўқитувчиларнинг ҳуқуқ ва мажбуриятларини белгилаб бериши билан бирга, уларнинг ижтимоий ҳимоясига оид масалаларни ҳам тартибга солиши маълум қилинди.
«Халқ сўзи» нашрига кўра, давра суҳбати давомида Халқ таълими вазири Шерзод Шерматов мактабларда обуна билан боғлиқ масалаларга ҳам тўхталиб ўтган.
— Мактабларда мажбурий обунани чеклаш борасидаги ишларимизни нотўғри талқин қилаётган, мени газета ўқимайдиган матбуот душманига айлантириб қўйганлари ҳақидаги хабарларни эшитяпман. Шахсан менинг иш столимда ҳар куни газеталар туради. Эрталаб ишимни «Халқ сўзи», «Народное слово», «Правда Востока» ва бошқа газеталарни ўқишдан бошлайман. Бу тарғиботни бошқача талқин қилиш нотўғри, деб ўйлайман , — деган Шерзод Шерматов.
Изоҳ (0)