Ўзбекистон «Миллий тикланиш» демократик партияси марказий кенгаши раиси Сарвар Отамуродов Халқ таълими вазирлиги фаолиятини танқид қилди. Бу ҳақда ЎзА хабар бермоқда.
Партия етакчисининг сўзларига қараганда, «Миллий тикланиш» партияси вакиллари Сирдарё, Самарқанд, Фарғона, Тошкент вилоятларидаги тарбияси оғир болалар учун мўлжалланган тўртта махсус мактабга бориб вазиятни ўрганган.
«Аҳвол криминал бўлиб ётибди, давлат бюджетидан ажратилган пуллар талан-торож. Ўзи шундоқ ҳам хулқи ёмон болалар орасида муҳит жуда ачинарли, ҳомиладор ёш қизлар бор, у шароитларда одам яшай олмайди. Мактабни битираман, деб турган ёшлар ҳарф танимайди, ўз исмини ҳам ёза олмайди», — дейди у.
«Бу жуда ачинарли, вазиятни ўрганиб бошимиз қотиб қолди. Қани бу ерда Халқ таълим вазирлигининг масъулияти, нега бу муаммоларга етиб боришмаяпти? Бу саволларга жавоб сўрайдиган вақт ҳам келди. Биз бу махсус мактаблардаги муаммоларни ҳукумат, бош вазир даражасигача олиб чиқдик, прокуратура органлари ҳам шуғулланди. Ҳозир бироз бўлса-да вазият яхшиланмоқда», — дея қўшимча қилди Отамуродов.
Аввалроқ Қўқондаги махсус, саломатлиги ва хулқида нуқсони бор қизлар таълим оладиган коллежнинг 16 ёшли ўқувчиси ҳомиладор бўлиб қолгани ҳақида хабар берилган эди. Бундан ташқари, февраль ойида Тошкентдаги мактаблардан бирининг 8-синфида ўқийдиган қиз ҳомиладор бўлиб қолгани маълум бўлганди.
Изоҳ (0)