Самарқанд вилояти ИИБ Жиноят қидирув бўлимининг Коррупция ва иқтисодий жиноятчиликка қарши курашиш бўлими ходимлари томонидан 26 февраль куни Самарқанд шаҳрида ўтказган тезкор тадбири натижасида 1986 йилда туғилган К.П ва 1992 йилда туғилган Ғ.М. алкоголли маҳсулотларни ноқонуний равишда сотаётганлиги аниқланган.
Самарқанд вилоят ИИБ матбуот хизмати раҳбари Ширин Норматованинг «Дарё»га маълум қилишича, К.П ва Ғ.М. Самарқанд шаҳридаги Қуйи Хўжасоат маҳалласида ўтказилган рейд давомида махсус харидорга 0,5 литрли «Журавли» номли қўлбола ясалган 225 дона ароқнинг ҳар бир донасини 8500 сўмдан 1 912 500 сўмга, 0,5 литрли «Филатов» номли қўлбола ясалган 30 дона ароқнинг ҳар бир донаси 12 000 сўмдан 360 000 сўмга сотган.
Олиб борилган тезкор тадбир давомида К.П ва Ғ.М.нинг яшаш уйидан ароқ маҳсулотларини ушлаб туришга мўлжалланган 117 дона картон, ароқларни ўрашга мўлжалланган целлофанлар, Тожикистонда ишлаб чиқарилган сиғими 1 литрлик пластмасса баклажкадаги «Руслан» номли 10 дона ароқ маҳсулотлари топилган.
Шунингдек, 167 дона турли номдаги сиғими 0,5 литрлик ва 0,7 литрлик шишалар, 2630 дона ароқ маҳсулотларини бўйин қисмига кийдириладиган «Журавли» ароқ ёрлиқлари, бир дона воронка, сиғими 0,5 литр бўлган Ўзбекистон Республикаси аксиз маркалари елимланган жами 30 шиша «Филатов» номли ароқлари ва 225 шиша сиғими 0,5 литр бўлган аксиз маркалари елимланмаган «Журавли» номли ароқлар ашёвий далил сифатида олинган.
Мазкур ҳолат юзасидан К.П ва Ғ.М.га нисбатан Жиноят Кодексининг тегишли моддаллари билан жиноят иши қўзғатилиб, суриштирув ишлари олиб борилмоқда.
Изоҳ (0)