Президентнинг Наманганга ташрифи, Сенат ялпи мажлиси, Жанубий Кореяда комага тушган ўзбекистонлик, ҳокимлик биноси ёнида ўзини ёқиб юборган сурхондарёлик ва куннинг бошқа хабарлари

28 февралнинг эътиборга молик янгиликлари — «Дарё» дайжестида.

Шавкат Мирзиёев ҳудудларни комплекс ривожлантириш бўйича олиб борилаётган ишлар билан танишиш, янги лойиҳаларни белгилаш мақсадида 28 февраль куни Наманган вилоятига жўнаб кетди.

Давлат раҳбари Тўрақўрғон иссиқлик электр станциясида амалга оширилаётган ишлар билан танишди.

Сўнг Наманганда халқ билан мулоқотда бўлди.

Шавкат Мирзиёев Тўрақўрғон туманидаги Ахсикент археологик ёдгорлик мажмуасини бориб кўрди.

Шундан кейин Тўрақўрғондаги энг замонавий саноат корхонасида бўлди.

***

28 февраль куни Олий Мажлис Сенатининг ўн саккизинчи ялпи мажлиси ўз ишини бошлади.

Олий Мажлиси Сенатининг ўн саккизинчи ялпи мажлисида маъруза қилган Сенат раиси Ниғматилла Йўлдошев мактаб таълими тизимидаги камчиликларга тўхталиб ўтди.

Олий Мажлис Сенати ялпи мажлисида «Ҳукуматни шакллантириш тартиби демократлаштириш ва унинг масъулияти кучайтирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида«ги қонун маъқулланди.

Сенат ялпи мажлисида ҳукумат қарорлари билан тасдиқланган ҳудудларни комплекс ривожлантириш дастурлари ижроси билан боғлиқ қатор муаммолар борлиги қайд этилди.

Сенат ялпи мажлисида «Ўзбекистон Республикасининг айрим қонун ҳужжатларига жамоатчилик назоратини кучайтиришга қаратилган ўзгартиш ва қўшимчалар киритиш тўғрисида»ги қонун муҳокама этилди ва рад қилинди.

***

26 февраль куни ОАВда 8 ой мобайнида Сеул шаҳри Новонгу туманидаги «Сангги Пик Пионвон» шифохонасида бўлиб келаётган, 1996 йилда туғилган А.Оқилов тўғрисида хабарлар тарқалди.

Ўзбекистон фуқароси Абрам Оқилов Жанубий Корея клиникаларидан бирида оғир аҳволда бўлиб тургани тўғрисида хабарлар тарқалиши муносабати билан ТИВ Консуллик-ҳуқуқий департаменти ушбу масала мамлакатнинг Сеул шаҳридаги элчихонаси доимий назорати остида эканлигини маълум қилди.

Ушбу ҳолат юзасидан Бандлик ва меҳнат муносабатлари вазирлиги ҳам ахборот берди.

***

24 февраль куни Сурхондарё вилояти Термиз тумани Учқизил шаҳрида эркак Термиз тумани ҳокимияти биноси олдида ўзига ўт қўйиб юборди.

Бош прокуратура хабарига кўра, фуқаро Б.Э.да тананинг 15-20 % қисмини I-II даражали алангадан термик куйиши, юқори ҳароратли аланга (олов) таъсир механизми натижасида етказилганлиги, оғирлик даражасига кўра «ўртача» оғирликдаги тан жароҳати деб баҳоланган.

***

Тошкентлик йигит Дархондаги 18 қаватли уйдан ўзини ташлади.

Тошкентда 23 февраль куни ёш йигит Дархондаги 18 қаватли уйнинг 15-қаватидан ўзини ташлаб, ўз жонига қасд қилди.

Йигит олган жароҳатлари оқибатида воқеа жойида вафот этган.