«Ўзавтосаноат» Наманганда «Norin Moto Bike» заводини ишга туширди

«Ўзавтосаноат» АЖ Наманган вилоятининг Норин туманида велосипед ишлаб чиқариш корхонасини ишга туширди, дея хабар беради GM Uzbekistan Жамоатчилик билан алоқалар хизмати.

Мазкур корхонани ташкил этиш бўйича келишув «Ўзавтосаноат» АЖ ва Lifan Group Co.Ltd компанияси томонидан имзоланган.

Lifan Group Co.Ltd компанияси ишлаб чиқариш учун бутловчи қисмларни етказиб бериш билан шуғулланади.

Эслатиб ўтамиз, 2018 йилнинг августида Президент Шавкат Мирзиёев велосипед ишлаб чиқаришни кўпайтириб, йўл бўйларида велойўлакчалар ташкил этиб, велосипедда юришни оммалаштириш зарурлигини таъкидлаган эди. Бу эса ўз ўрнида мазкур корхонанинг ташкил этилишида муҳим туртки бўлди.Корхонада дастлаб ишлаб чиқариш ҳажми йилига 150 мингни ташкил қилади. Босқичма-босқич мазкур кўрсаткич ошиб бориш режалаштирилган.

Мазкур лойиҳа Ўзбекистон Республикасининг 2019 йилги Инвестицион дастурига киритилган бўлиб, унинг доирасида Ўзбекистонга 200 минг доллар инвестиция жалб қилиниши кўзда тутилган.

Келгусида «Norin Moto Bike» МЧЖ корхонада мотоцикллар, тритцикллар, скутерлар ва мопедлар ишлаб чиқариш йўлга қўйилади.

Қайд этиш жоизки, «Norin Moto Bike» заводи ходимлари ишлаб чиқаришни йўлга қўйишдан олдин Хитойда тажриба ўтаб қайтган. Янги завод ҳозирда 150 дан ортиқ маҳаллий аҳолини ишга жойлаштириш имконини беради, келгусида иш ўринларини 500 тага етказиш режалаштирилган.