Деҳқонобод тумани ҳокимлиги, туманнинг «Чоштепа» қишлоғидаги жин кўприкни фош этган мақолага муносабат билдириб, мақоладан сўнг амалга оширилган ижобий ишлар ҳақида маълум қилди. Ҳокимлик шунингдек, «Дарё»га йўллаган муносабат хатида ижобий ўзгаришларни таҳририят журналисти ўз кўзи билан кўриб кетиши мумкинлигини ҳам қўшимча қилган. Таклифга биноан «Дарё» мухбири «Чоштепа»да бўлди.
Обиравон қишлоқ фуқаролар йиғинига кириб боришимиз билан йўл устидаги кўприк ёнида қум-шағал ташиётган 2 та юк машинаси ва йўлни текислаётган «Гредер»га дуч келдик.
«Мақоладан сўнг «Обиравон» ҚФЙга олиб кирувчи, 1978 йилда қурилган асосий кўприк ёнидан ўтувчи «Чоштепа» қишлоғининг бир ярим километрлик йўлини таъмирлаш ишларини бошлаб юбордик», — дейди туман ҳокими Зоир Алиқулов. – Мазкур йўлдан илгари ҳам фойдаланса бўларди, албатта. Аммо баъзи жойлари талабга жавоб бермагани учун аҳолига ноқулайлик туғдирган. Шунинг учун қишлоқ марказигача бўлган масофага қум-шағал ётқизиб, текислаб чиқяпмиз. Энди лойгарчилик пайтида ҳам бемалол кириб-чиқса бўлади».
Туман ҳокимлигининг муносабат хатида аҳолининг «Дарё» мухбирига берган маълумотида тилга олинган қишлоққа олиб кирувчи 3 километрлик йўл, аслида 1,5 километр бўлиб, «Бойқўрғон паҳлавони» хусусий корхонасига тегишли экин майдонидан ўтганлиги айтилади. Туман ҳокимлигига кўра, мазкур йўлни аҳоли ўзбошимчалик билан йўл қилиб олган. Аслида қишлоққа олиб кирувчи асосий йўл 1,3 километр бўлиб, ҳозирда таъмирланмоқда.
Қишлоққа иккинчи маротаба қилган сафаримиз чоғида туман ҳокимлиги мутасаддилари қишлоққа олиб кирувчи 2 та шундай йўлни кўрсатишди. Кўрган йўлларимизнинг бири ҳақиқатдан ҳам экин майдонидан ўтган бўлиб, лойгарчилик пайтида ўтиб бўлмас даражага келиши кўриниб турибди. Мутасаддилар кўрсатган иккинчи йўл эса ўша қум-шағал тўкилиб, таъмирланаётган йўл экан.
Кези келганда шуни алоҳида таъкидлаш лозимки, аҳоли билан дастлабки мулоқотимизда қарийб 50–60 нафар киши даврасида бўлган бўлсак, ақалли бирор киши айтилаётган йўл экин майдонидан ўтганлигини тилга олмаганди. Ҳатто Обиравон ҚФЙ раиси Абдиолим Яхшибоев ҳам.
«Ўшанда аҳоли экин майдони ўртасидан ўтган йўлни назарда тутаётганини мен ҳам билмабман» – дейди раис бува.
«Агар экин майдони назарда тутилган бўлса, экин майдонига қум-шағал тўкиб, таъмирлашнинг имкони йўқ, — дейди туман ҳокими Зоир Алиқулов. — Боиси бу ерга ғалла экилган. Ғаллани пайҳон қилиб, йўл ўтказиб бўлмайди. Қолаверса, тадбиркор ҳам бунга изн бермаслиги тайин. Кўприк ёнидаги йўл айтилган бўлса, йўл фойдаланиш учун бугун шай ҳолатга келтирилди».
Маълум бўлишича, туман ҳокимлиги мазкур қишлоқдан 63-умумтаълим мактабига қатновчи 104 нафар ўқувчининг жин кўприкдан ўтиб юришига чек қўйиш мақсадида асосий кўприкдан ўтган жойда қад ростлаган Саноат касб-ҳунар коллежидан 4 та синфхона ажратиб, икки «смена»да ўқишни йўлга қўйган.
«Ҳозирда 104 нафар ўқувчимиз коллеж биносидан ажратилган синфхоналарда таҳсил олишни бошлади, — дейди 63-умумтаълим мактаби директори ўринбосари Худойберди Аҳмедов. – Илгари 63 нафар ўқувчимиз ўша жин кўприкдан ўтиб, мактабга борарди. Айни кунда эса бунга ҳожат қолмади».
Тумангаз корхонаси раҳбари Норменгли Тўлаганов берган маълумотларга кўра, дастлабки мақолада тилга олинган газ баллон ҳақидаги муаммо, бугунги кунда буткул бартараф этилган.
«Мазкур қишлоқдаги газ баллонга эҳтиёжи бор 17 та хонадон 55 литрлик газ баллонлари билан таъминланди, — дейди тумангаз бошлиғи Норменгли Тўлаганов. – Айни кунда газ баллонсиз хонадон қолмади».
«Мақолада раис туман ҳокимлиги томонидан тайинлаб қўйилган деган гапга жавобан шуни маълум қиламизки. Қишлоққа ҳали ҳеч қандай раис тайинланмаган, — дейди туман ҳокими. – Ҳужжатлаштириш ишлари давом этмоқда. Насиб этса қишлоқ раиси жорий йил май ойида бўлиб ўтадиган сайлов жараёнларида аниқланади».
Туман ҳокимлиги аҳолининг трансформатор масаласидаги эътирозини ҳам ўрганиб, қишлоқда 60 та хонадон бўлса-да, ҳозирда трансформатордан 41 та хўжалик ток олишини аниқлаган. Маълумотда айтилишича, қишлоқнинг юқори қисмида яна битта трансформатор бўлиб, 16 та хўжаликни узлуксиз равишда электр токи билан таъминлаб келар экан. Токдаги «ўйнаш»лар эса қиш мавсумида аҳолининг электр печларидан фойдаланиши билан боғлиқ экан.
Муносабат хатида шунингдек, дастлабки мақолада тилга олинган фуқароларга ер ажратиб берилганлиги айтилган. Ер сўраб келган фуқаролар ҳоким топшириғига кўра қаматилган деган фикрларга жавобан эса туман ИИБ бошлиғи Н.Исмоилов фуқаролар Шамсиддин Пўлатов ва Шариф Бойпўлатовлар вақтинчалик ҳибсхонада сақланмаганлигини билдирган.
Муносабатда жамоат ишларига жалб қилинган 9 нафар ишчига август ойи учун маош тўлиқ тўлаб берилганлигини, сентябрь ва октябрь ойларида эса ҳеч қандай иш бажарилмаганлиги сабабли уларга иш ҳақи тўланмаслигини маълум қилишган.
Туман ҳокимлигининг «Дарё»га қўшимча қилишича, «Чоштепа»да яшовчи 56 та хонадон уй-жойлари ноқонуний равишда, архитектура ва қурилиш қоидаларига риоя қилинмасдан қуриб олинганлиги айтилади.
Изоҳ (0)