18 февраль куни соат 9:00 ларда Денов тумани 74-умумий ўрта таълим мактабининг география фани ўқитувчиси А.Э ушбу мактабнинг 5 «B» синфида дарс машғулотларини ўтаётган вақтида ўқувчи А.И дарсга ҳалақит бериб жим ўтирмаганлиги сабабли, қўлида бўлган кўргазмали таёқ билан унинг чап қўли соҳасига бир марта уриб, тан жароҳати етказган. Бу ҳақда Бош прокуратура матбуот хизмати «Дарё» га хабар берди.
Денов туман тиббиёт бирлашмасининг дастлабки маълумотига кўра, вояга етмаган А.Ининг чап елка суяги дисптор қисми қониқарли ҳолатда туриши ва қонталаш каби шикаст борлиги аниқланган.
Мазкур ҳолат юзасидан 74-умумий ўрта таълим мактаби директор ўринбосари Ш.М, психологлар З.Қ, С.М, синф раҳбари Н.Х ўз тушунтиришларида мактабнинг 5 «B» синф ўқувчиси А.И 2018—2019-ўқув йили жараёнида ўзининг ёмон хулқи ва оғир тарбияси билан мактаб маъмурияти, мактаб психологлари ва синф раҳбарини дарс бериш жараёнида турли муаммолар чиқариб келаётганлиги, 18 февраль куни ўқувчи А.И ўқитувчи А.Эга дарс жараёнига ҳалақит берганлиги сабабли, ўқитувчи кўргазмали таёқ билан қўлига уришга мажбур бўлганлиги, шундан сўнг А.И онаси М.Н мактабга келиб ўқитувчи А.Эni ҳақорат қилганлигини баён қилган.
Вояга етмаган 2007 йилда туғилган А.И ўз тушунтиришида 18 февраль куни соат 9:00 ларда дарс вақтида ўқитувчи ундан олдин уч кишини жим ўтир деб, кейин унинг олдига келиб, нимага жим ўтирмайсан, дарсга ҳалақит бердинг деб чап қўл соҳасига бир марта таёқ билан урганлигини, шифохонага бориб кўриниб қўлига гипс боғлам қўйилганлигини, шифохонада ётиб даволанмаганлигини билдирган.
Мазкур ҳолат юзасидан 1960 йилда туғилган А.Э ўз тушунтиришида 18 февраль куни соат 9:00 ларда география фани дарсида ўқувчи А. И жим ўтирмасдан болаларни тинчлигини бузганлиги учун қўлида бўлган кўргазмали таёқ билан унинг чап қўлига бир марта урганлигини, лекин қаттиқ урмаганлигини, А.И ҳар доим дарсида бузғунчилик қилиб келганлигини, илгари дарсларида ўқитувчи ўтирадиган столга клей суртиб қўйганлигини, бу ҳолат бўйича синф раҳбарига айтиб уни огоҳлантирганлигини билдирган.
Бундан ташқари ҳолат юзасидан 74-умумий ўрта таълим мактабининг 5 «B» синф ўқувчилари М.Б ва Н.Н ўз тушунтиришларида 18 февраль куни биринчи соат дарс география бўлганлиги сабабли, ўқитувчи А.Э кириб келиб дарс ўтаётган вақтда синфдоши А.И дарс вақтида ўқитувчига ҳар хил қилиқлар қилиб, ножўя сўзларни айтганлигини, ўқитувчи жим ўтир деган вақтида ҳам жим ўтирмаганлигини, ўқитувчи қўлида бўлган кўргазмали таёқ билан унинг чап қўл соҳасига бир марта урганлигини, кейинги дарс соати вақтида А.И уйига кетиб қолганлигини баён қилган.
Ҳолат юзасидан 74-умумий ўрта таълим мактабининг 5 «B» синф раҳбари Н. Х ўз тушунтиришида А.Ининг хулқи ёмон эканлигини, дарс вақтида ҳам ҳар хил бузғунчилик ишлари билан шуғулланиб келганлигини, 23 январь ва 5 февралда А.И дарс жараёнида география ўқитувчиси А.Э дарс ўтишга келган вақтида, у ўтирадиган стулга клей суртиб қўйганлигини, бу ҳолат бўйича мактаб раҳбарияти номига билдириш хати бериб, муҳокама қилганлигини, ҳолатни А.Ининг ота-онасига ҳам айтганлигини, 18 февраль куни ҳам биринчи соат дарси вақтида яна А.И дарс вақтида бузғунчилик қилиб ўқитувчи А.Эга гап қайтариб, ҳар хил қилиқлар қилганлиги сабабли ўқитувчи кўргазмали таёқ билан унинг қўл соҳасига урганлигини баён этган.
Вояга етмаган А.Ига нисбатан суд-тиббиёт экспертизаси тайинланган.
Ҳозирда ҳолат юзасидан Денов тумани ИИБ томонидан терговга қадар текширув ҳаракатлари олиб борилмоқда.
Терговга қадар текширув ҳаракатлари Бош прокуратура томонидан назоратга олинган.
Изоҳ (0)