Санкт-Петербург метросида теракт уюштирганлар устидан суд мажлиси бошланди

Москва округ ҳарбий суди 25 февраль, душанба куни Санкт-Петербург метросида теракт уюштирганлар устидан биринчи суд мажлисини ўтказади. Бу ҳақда суд матбуот хизматига таяниб, Sputnik хабар берди.

Суд мажлисининг тайёрлов қисмида суд мажлиси иштирокчилари янги гувоҳлар, экспертлар ёки мутахассислар чақириш, ашёвий далиллар ва ҳужжатлар талаб қилиб олиш ёки қўшимча далиллар тўғрисида илтимоснома келтиришлари мумкин.

2017 йил 3 апрель куни Санкт-Петербург метросининг «Сенная плошадь» ва «Технологический институт» бекатлари оралиғида вагон ичида портлаш содир этилди. Ҳодисада 16 киши, жумладан, худкуш террорчи Акбаржон Жалилов ҳалок бўлди.

Тергов маълумотларига кўра, Қирғизистоннинг Қорасув туманидан бўлган Сирожиддин Мухторов Санкт-Петербург метросида уюштирилган теракт буюртмачисидир. Ҳозирда у сиртдан ҳибсга олинган. Шунингдек, ўзбекистонлик Бобуржон Маҳбуб ҳам теракт ташкилотчиларидан бири сифатида сиртдан ҳибсга олинган.

Мазкур жиноий иш юзасидан Сайфулла Ҳакимов, Шоҳиста Каримова (ушбу жиноий иш юзасидан қўлга олинган ягона аёл), Акрам Азимов, Муҳаммадюсуф Мирзаалимов, Аброр Азимов, Дилмурод Муйдинов, Содиқ Ортиқов, Аъзамжон Маҳмудов, Баҳром Эргашев, Иброҳим Эрматов ва Муҳаммадюсуф Эрматов айбланувчи сифати суд қилинади.

Тергов Аброр Азимовни ҳам теракт ташкилотчиларидан бири деб ҳисоблайди. Дастлабки маълумотларга кўра, унинг укаси Акрам Туркияда теракт содир этиш учун халқаро террорчи гуруҳнинг фаол иштирокчисидан пул олган, сўнг худкушга топширган.