Қишлоқ хўжалиги вазирининг ўринбосари Саидкамол Хўжаев бошчилигидаги Ўзбекистон делегацияси Польшада бўлди. Делегация таркибига «Халқ банки» ва фермер хўжаликлари вакиллари кирди. Бу ҳақда «Дарё»га вазирлик матбуот хизмати маълум қилди.
Польша қишлоқ хўжалиги вазирининг ўринбосари Шимон Гизинский билан учрашув доирасида агросаноат соҳасида икки томонлама ҳамкорликни кенгайтириш режалаштирилди. Жумладан, томонлар қишлоқ хўжалиги бўйича қўшма ишчи гуруҳ тузиш ва жорий йилнинг биринчи ярмида дастлабки учрашувни ўтказиш бўйича келишишди.
Бундан ташқари, Bronisze логистика марказида «Ўзбекистон кунлари» ўтказилиши бўйича келишувга эришилди. Ушбу форматдаги тадбирнинг ўтказилиши Ўзбекистон қишлоқ хўжалиги маҳсулотларининг экспорт салоҳиятини Польшадаги энг йирик савдо платформаларидан бирида тақдим этиш имконини беради. Польша томони Ўзбекистонда етиштирилган қовун, гилос ва анор маҳсулотларини сотиш учун логистика маркази ҳудудида махсус майдон тақдим этишга тайёрлигини билдирди.
Ташриф давомида делегация агросаноат соҳасидаги компаниялар раҳбарлари билан бир қатор учрашувлар ўтказди. Ўзбекистонда яқин келажакда Milex (томчилатиб суғориш), Igloszron (парранда маҳсулотлари), Arno (интенсив боғдорчилик) компаниялари ўз лойиҳаларини амалга ошириш бўйича режаларини маълум қилди.
Польша савдо-саноат палатаси билан Ўзбекистон жанубида in-vitro усулида уруғлик картошка етиштириш бўйича кластер ташкил этиш режалаштирилди.
Изоҳ (0)