Бухорода маст ҳолатда машина бошқариб, қозоғистонлик сайёҳни уриб юборган ҳайдовчига ҳукм ўқилди

Жиноят ишлари бўйича Бухоро туман судида велосипедда Ўзбекистон бўйлаб саёҳат қилаётган қозоғистонлик туристни уриб юборган ҳайдовчи иши кўриб чиқилди. Бу ҳақда туман суди раиси Нозимжон Жўраев «Дарё»га хабар берди.

2018 йилнинг 14 октябрь куни Ўзбекистоннинг кўҳна обидалари ва зиёратгоҳларини зиёрат қилиш ва саёҳат қилиш мақсадида велосипедда йўлга чиққан Қозоғистон фуқароси Муратгали Хожабергенов Бухоро туманига етганда автоҳалокатга учради. Хожабергеновни Cobalt машинасини маст ҳолатда бошқариб келаётган Муяссар Қобулов уриб юборган. Қозоғистон фуқароси Республика шошилинч тиббий ёрдам илмий марказининг Бухоро филиалига олиб келинган ва оғир тан жароҳатлари натижасида шу ерда вафот этган.

Бухоро туман «Кўчкўмар» МФЙ биносида ўтган очиқ сайёр суд мажлисида 65 ёшли Муяссар Қобулов айбига тўлиқ иқрорлик билдирган. У Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) билан айбдор деб топилди.

Суд Қобуловга нисбатан жазо тайинлашда унинг айбига иқрорлигини, қилмишидан чин кўнгилдан пушаймонлигини, жабрланувчига етказилган зарарни бартараф қилганлигини жазони енгиллаштирувчи, мастлик ҳолатида жиноят содир этганини эса жазони оғирлаштирувчи ҳолат, деб ҳисоблади.

Судланувчи Муяссар Қобуловга жазо тайинлашда, жиноятнинг хусусияти ва ижтимоий хавфлилик даражасини, унинг нафақа ёшида эканлигини, муқаддам судланмаганлигини, шунингдек, жабрланувчига етказилган зарарни тўлиқ бартараф қилганлигини, жабрланувчи томоннинг унга нисбатан даъвоси йўқлигини жиноятнинг ижтимоий хавфлилик даражасини жиддий камайтирувчи ҳолатлар, деб ҳисоблаган. У 2 йилга транспорт воситаларини бошқариш ҳуқуқидан маҳрум этилди ва 3 йилга озодликни чеклаш жазоси тайинланди.