Сурхондарё вилоятининг Термиз туманида истиқомат қилувчи Алмурод Тўраев 2 ўғил, 2 қизни тарбиялаб, турмуш ўртоғи билан тинч-тотув, бахтли ҳаёт кечириб келаётган эди. Бироқ ўғилларининг ноқобил чиқиши унинг бошини эгди, дея хабар беради ЎзА.
1974 йилда ҳамда 1987 йилда туғилган ака-ука Илҳом ва Эркин Тўраевлар 2011 йилда Россияга ишлаш учун боради. Афсуски, улар у ерда «Ўзбекистон ислом ҳаракати» халқаро террорчи ташкилоти сафига қўшилиб қолади ва одамларни ёллаш билан шуғуллана бошлайди. Шу орада Илҳом Тўраев турмуш ўртоғи ва фарзандларини ҳам ёлғон ваъдалар билан ўз ёнига чақириб олади. Аммо, Илҳомнинг қинғир ҳаракатлари узоққа чўзилмади. Тез орада у ҳуқуқни муҳофаза қилувчи идоралар томонидан қўлга олиниб, Ўзбекистонга депортация қилинди.
Илҳом Тўраев қўлга олинган вақтда унинг укаси Эркин Туркиянинг Истанбул шаҳрида қўним топиб, Покистон, Афғонистон ва Сурия давлатларидаги «Ўзбекистон ислом ҳаракати» ва «Имом ал-Бухорий катибаси» халқаро террорчи ташкилотлар сафига янги аъзоларни ёллаш ва жўнатиш ишлари билан шуғулланиб келарди. Шундан сўнг Эркин 2013 йил акасининг турмуш ўртоғи ва фарзандларини Россиядан Туркияга чақириб олади ва уларни ҳам ўзларининг сафига қўшади.
2019 йил Алмурод Тўраев учун хайрли бошланди. Сабаби, тўнғич фарзанди Илҳом Тўраевнинг турмуш ўртоғи ва 3 нафар вояга етмаган фарзанди Давлат хавфсизлик хизмати ходимларининг саъй-ҳаракатлари билан Туркиядан Ўзбекистонга қайтарилди.
— 2013 йили ўзга юртларга кетиб, адашиб диний оқимларга аралашиб қолдим, — дейди Холбиби Кўчирова. — Истамбул шаҳрида фарзандларим билан ижарада қийналиб яшадим, болаларимнинг ҳужжатлари йўқ эди, ҳеч қаерга мурожаат қилолмадим. 10 ёшли катта фарзандим ҳужжати йўқлиги учун мактабда ўқий олмади. Ватанга қайтгим келарди, лекин қайтишни иложи бўлмади. Президентга минг раҳмат, бизга шундай имкониятлар берди. Мана бугун фарзандларим билан ўз уйимда ўтирибман.
67 ёшни қаршилаган Алмурод Тўраев марҳум турмуш ўртоғи билан фарзанд доғида ҳаётнинг кўп машаққатларини чекди. Ўтган йили фарзандлари доғида аёли қазо қилгач, ҳовлида бир ўзи қолганди.
Ҳозирда унинг катта ўғли Илҳом Тўраев Шеробод туманида жойлашган манзилли колонияда жазо муддатини ўтаяпти. Шу билан бирга, Жарқўрғон туманидаги ғишт заводида шартнома асосида ишлаб келмоқда.
Изоҳ (0)