Ўзбекистонда 1941—1945 йиллардаги Иккинчи жаҳон урушида фашизм устидан қозонилган Ғалабанинг 75 йиллиги шарафига «Иккинчи жаҳон урушидаги Ғалабанинг 75 йиллиги» эсдалик юбилей медали таъсис этилади. Бу Норматив-ҳуқуқий ҳужжатлар муҳокамаси порталида жойлаштирилган ва Мудофаа вазирлиги томонидан ишлаб чиқилган Президент фармони лойиҳасида кўзда тутилган.
Эсдалик юбилей медали билан Ўзбекистон фуқаролари — «1941—1945 йиллардаги Улуғ Ватан урушида Германия устидан қозонилган ғалаба учун» ва «Япония устидан қозонилган ғалаба учун» медаллари билан, уруш йилларида жанговар хизматлари учун олинган бошқа орден ва медаллар билан мукофотланган ёки уруш қатнашчиси гувоҳномасига ёхуд Ватан уруши ногирони гувоҳномаларига эга бўлган Иккинчи жаҳон уруши қатнашчилари ва ногиронлари тақдирланади.
Шунингдек, Иккинчи жаҳон уруши йилларида фидокорона меҳнати учун мукофотланган, жумладан, «1941—1945 йиллар Улуғ Ватан урушидаги шавкатли меҳнати учун», «Меҳнатдаги жасорати учун», «Меҳнатда ўрнак кўрсатганлиги учун» медалларига ёки 1941—1945 йиллардаги уруш даврида қуролли кучларда фуқаро шахсларни эркин ёллаш бўйича штат лавозимида бўлганлик тўғрисидаги гувоҳномага эга бўлган меҳнат фронти қатнашчилари ҳам мукофотланади.
Уларга 8 миллион сўм миқдорда бир марталик пул мукофоти топширилади.
Ҳужжат билан Вазирлар Маҳкамасига 2020 йилнинг 1 февралига қадар юбилей медалларини топшириш ва пул мукофотларини тўлаш тартибини белгилаш топширилган.
Изоҳ (0)