Бугун, 21 февраль куни Бухоро шаҳрида зиёрат туризми бўйича биринчи халқаро форум ўз ишини бошлади. Журналист Манзура Бекчонова форумда иштирок этаётган хорижий сайёҳларнинг фикри билан қизиқди.
«Ўзбекистонга кириш визасининг бекор қилиниши биздан келаётган сайёҳлар сонининг ортишига катта ҳисса қўшди. Мен бунинг учун Ўзбекистон раҳбариятига катта раҳмат айтаман. Олдин шу виза оворагарчиликлари сабаб кўпчилик йўлга чиқишни хоҳламасди. Чунки визани олиш учун 2—3 ҳафта кутишга тўғри келарди. Ҳозирда яна бир муаммомиз бор. Туркиядан Бухорога тўғридан-тўғри рейс йўқ. Агар шаҳарнинг ўзига самолёт келганида биздан ташриф буюрувчи сайёҳлар оқими янада кўпаярди.
Бундан ташқари, Ўзбекистонга келиш учун самолёт билетлари ҳам бироз қиммат. Биз Европага боришимиз учун 500 АҚШ доллари етади аммо Ўзбекистонга самолёт чиптаси 700 АҚШ доллари туради. Бу масалани ҳам кўриб чиқишларини сўраб масъулларга ёзма мурожаат билдирдик.
Ўзбекистон билан туризм соҳасида ҳамкорлик қилиш ниятларимиз бор. Биз бу ерга кўп-кўп сайёҳларни олиб келишимиз учун Бухорода катта меҳмонхоналар қуриш керак. Шунингдек, ҳаво йўллари имкониятларини қулайлаштириш зарур. Ана шунда инвесторлар икки томонлама фойдали шартномаларга қўл уради», — дейди Туркиянинг йирик сайёҳлик фирмаси раҳбари Хасан Гулсерен.
Ҳиндистоннинг Туризм саёҳат компанияси директори Викас Хапдоки шундай дейди:
«Саёҳатимиз давомида биз шунга гувоҳ бўлдикки, ҳинд халқи билан ўзбек халқи ўртасида ўзаро ўхшаш бўлган ижобий хусусиятлар жуда кўп. Биз бу ерда айнан ўзбек халқи ҳам ҳинд халқи каби самимий ва меҳмондўст эканлигини кўрдик. Биласиз, бизнинг тарихий боғлиқлигимиз ҳам бор, умуман дунёнинг етти мўъжизасидан бирини барпо этган Бобурийлар сулоласи бундан гувоҳлик беради. Юртимизда 23 миллиондан зиёд мусулмонлар бор. Бу Ҳиндистон аҳолисининг 12 фоизини ташкил қилади. Ушбу рақам камдек кўриниши мумкин, аммо агар улар бир вақтда юртингизга зиёратга келишни хоҳлаб қолишса, бу ерда меҳмонхона етишмай қолиши мумкин».
Изоҳ (0)