Bugun, 21-fevral kuni Buxoro shahrida ziyorat turizmi bo‘yicha birinchi xalqaro forum o‘z ishini boshladi. Jurnalist Manzura Bekchonova forumda ishtirok etayotgan xorijiy sayyohlarning fikri bilan qiziqdi.
“O‘zbekistonga kirish vizasining bekor qilinishi bizdan kelayotgan sayyohlar sonining ortishiga katta hissa qo‘shdi. Men buning uchun O‘zbekiston rahbariyatiga katta rahmat aytaman. Oldin shu viza ovoragarchiliklari sabab ko‘pchilik yo‘lga chiqishni xohlamasdi. Chunki vizani olish uchun 2—3 hafta kutishga to‘g‘ri kelardi. Hozirda yana bir muammomiz bor. Turkiyadan Buxoroga to‘g‘ridan-to‘g‘ri reys yo‘q. Agar shaharning o‘ziga samolyot kelganida bizdan tashrif buyuruvchi sayyohlar oqimi yanada ko‘payardi.
Bundan tashqari, O‘zbekistonga kelish uchun samolyot biletlari ham biroz qimmat. Biz Yevropaga borishimiz uchun 500 AQSh dollari yetadi ammo O‘zbekistonga samolyot chiptasi 700 AQSh dollari turadi. Bu masalani ham ko‘rib chiqishlarini so‘rab mas’ullarga yozma murojaat bildirdik.
O‘zbekiston bilan turizm sohasida hamkorlik qilish niyatlarimiz bor. Biz bu yerga ko‘p-ko‘p sayyohlarni olib kelishimiz uchun Buxoroda katta mehmonxonalar qurish kerak. Shuningdek, havo yo‘llari imkoniyatlarini qulaylashtirish zarur. Ana shunda investorlar ikki tomonlama foydali shartnomalarga qo‘l uradi”, — deydi Turkiyaning yirik sayyohlik firmasi rahbari Xasan Gulseren.
Hindistonning Turizm sayohat kompaniyasi direktori Vikas Xapdoki shunday deydi:
“Sayohatimiz davomida biz shunga guvoh bo‘ldikki, hind xalqi bilan o‘zbek xalqi o‘rtasida o‘zaro o‘xshash bo‘lgan ijobiy xususiyatlar juda ko‘p. Biz bu yerda aynan o‘zbek xalqi ham hind xalqi kabi samimiy va mehmondo‘st ekanligini ko‘rdik. Bilasiz, bizning tarixiy bog‘liqligimiz ham bor, umuman dunyoning yetti mo‘jizasidan birini barpo etgan Boburiylar sulolasi bundan guvohlik beradi. Yurtimizda 23 milliondan ziyod musulmonlar bor. Bu Hindiston aholisining 12 foizini tashkil qiladi. Ushbu raqam kamdek ko‘rinishi mumkin, ammo agar ular bir vaqtda yurtingizga ziyoratga kelishni xohlab qolishsa, bu yerda mehmonxona yetishmay qolishi mumkin”.
Izoh (0)